VIKEKE, 20 Fevereiru 2026 (TATOLI)—Xefe Sentru Saúde Postu Lakluta, Munisípiu Vikeke, Bendito Soares, husu abitante Postu Lakluta halo limpeza idak-daik hela fatin hodi prevene ba moras dengue.
“Maske to’o agora ami seidauk rejista kazu dengue iha ami-nia postu, maibé ha’u hakarak apela ba ami-nia komunidade katak tenke halo limpeza iha idaidak nia uma, hamoos lixu no bee nalihun sira atu prevene moras,” Bendito Soares ba TATOLI iha Postu Lakluta, Sesta ne’e.
Bendito haktuir, husi fulan-Janeiru to’o fulan-Fevereiru ne’e komunidade no labarik sira moras konsulta iha sentru saúde maibé hafoin teste rezultadu negativu.
Nia dehan pesoál saúde husi Postu Lakluta halo ona promosaun saúde ba komunidade iha postu saúde, avizu liuhusi igreja no serimónia importante sira sempre fó hanoin ba komunidade atu halo prevensaun ba moras dengue.
Kazu sira-ne’ebé rejista iha Postu Lakluta hahú fulan-Janeiru to’o fulan-Fevereiru ne’e, Bendito informa, kazu hamutuk tolu mak hanesan Insfesaun Respiratóriu Aguda (ISPA), tee-been no moras kulit.
“Dadus kazu moras sira-ne’ebé ita rejista nnúmeru aas mak hanesan kazu ISPA hamutuk 581, kazu tee-been hamutuk 98 no moras kulit hamutuk ualu (8). Moras hirak-ne’e impaktu hosi konsume bee mota no bee posu. Pasiente sira mai ita fó ai-moruk no rekupera ona. Kona-ba ai-moruk daudaun ne’e ita sufisiente,” nia tenik.
Jornalista: Vitorino Lopes da Costa
Editór: Xisto Freitas da Piedade
