VIKEKE, 20 Fevereiru 2026 (TATOLI)—Xefe Suku Vessoru, Postu Administrativu Uatulari, Munisípiu Vikeke, Paulo Fernandes informa projetu reabilitasaun estrada metru 700 husi Programa Nasionál Dezenvolvimentu Suku (PNDS) ba tinan 2025 iha Suku Vessoru konkluidu.
“Obra PNDS ba tinan 2025 ne’e ami deside prioridade ba estrada sira iha ami-nia suku laran. Nune’e, iha orsamentu PNDS tinan 2025, ami aloka ba reabilitasaun estrada metru 700,” Paulo Fernandes ba jornalista sira iha Suku Vessoru, Sesta ne’e.
Autoridade ne’e relata konstrusaun estrada ne’e gasta orsamentu hamutuk $25.945,13 hodi konstrui item sira hanesan barajen, pasadeira, baleta no ateru uza rai henek.
Nia subliña konstrusaun ne’e envolve badaen lokál iha Suku Vessoru no akompaña husi ekipa jestaun suku no ekipa téniku PNDS postu no munisípiu.
“Estrada ne’e liga bá aldeia hitu iha Suku Vessoru no liga mós bá Eskola Sekundária Filiál Vessoru. Ha’u sente estrada ne’e bele fasilita ona ita-nia komunidade no estudante sira asesu ba eskola,” Paulo informa.
Entretantu, Suku Vessoru iha aldeia hitu kompostu husi Aldeia Balabasiba, Mau-Boru, Kulu-Bere, Baha’o, Uani-Uma, Baha-Buga no Matau ho totál populasaun 1.519 kompostu husi mane 785 no feto 734.
Jornalista: Vitorino Lopes da Costa
Editór: Xisto Freitas da Piedade
