DILI, 22 Fevereiru 2026 (TATOLI)-Ministru Obra Públika, Samuel Marçal, klarifika problema kona-ba Postu Venda Pulsa Eletrisidade sira sistema atendimentu falla ka la’o lentu tanba kauza husi ema atake ka hacker sistema Eletrisidade de Timor-Leste (EDTL).
“Ha’u hanesan ministru husu deskulpa ba povu tomak ne’ebé foin lalais mai hein kle’ur iha postu venda sira tanba sistema eletrisidade la’o lentu tebes, tanba ema atake (hackerr) ida-ne’e afeta sistema hotu la la’o. Maibé akontesimentu sira-ne’e la’ós de’it ba EDTL sistema free balance iha Ministériu Finansa mós ema sempre buka atake ho virus,” Ministru Samuel Marçal hateten ba jornalista sira iha Taibesi, ohin.
Nian dehan, hotu-hotu hatene sistema sira-ne’ebé iha foin mak prosesu dijitalizasaun ida-ne’e fó oportunidade ba ema gosta tama sistema sira-ne’e, maibé situasaun sir- ne’e la’ós akontese de’it iha Timor-Leste maibé mós ba nasaun sira seluk.
Tuir nia, impaktu ka problema seluk ne’ebé afeta ba sentru venda la la’o mak liña internet ne’ebé liga husi Telemovel ba sistema EDTL nian ne’e mós tun entaun afeta ba sistema lentu.
“Bainhira akontese han tempu uitoan maibé ita-nia tékniku sira rekupera fila-fali, agora la’o di’ak ona. maibé husi ne’ebá ita hatene katak ita-nia sistema seidauk metin didi’ak, presiza atu hametin di’ak liután,” nia dehan.
Nia akresenta, ho esperiénsia sira-ne’e hotu fanu Governu buka solusaun maibé hotu-hotu hatene Timor-Leste iha faze ne’ebé foin hadi’a sistema sira no foin tama dijitalizasaun. Timor-Leste rekoñese mós katak Tékniku Informátika (IT) mós sei fraku ka foin iha faze aprende, entaun sira-ne’e hotu kontribui ba ema koko atake ho virus oioin.
“Maibé daudaun ne’e hadi’a hotu ona no komesa di’ak ona. Ha’u espera katak ba oin ita aprende husi fallansu sira-ne’e hotu, buka hametin no seguru di’ak liután,” Membru Governu ne’e dehan.
Jornalista : Arminda Fonseca
Editór : Cancio Ximenes
