VIKEKE, 23 Fevereiru 2026 (TATOLI)—Xefe Suku Uma-Tolu, Postu Administrativu Lakluta, Munisípiu Vikeke, Eduardo Soares, informa akontesimentu udan-boot iha Domingu (22/02), rezulta abitante ida lakon vida tanba mota Sumaku lori.
“Udan-boot durante loron ida tomak to’o kalan rezulta mota korrente maka’as, halakon ha’u-nia abitante ida nia vida. Abitante ne’e horisehik maizumenus tuku 19h00 bá toos atu haree manu mak hetan dezastre mota lori,” Eduardo Soares ba TATOLI iha Postu Vikeke Vila, Segunda ne’e.
Nia haktuir ohin dadeersan mak matebian ninia espoza no família sira bá buka tuir iha toos, maibé la hetan matebian. Nune’e, família sira kontinua buka iha mota ninin sira, mak hetan fali matebian nia sinelus no depoiz hetan matebian nia isin-mate latan hela iha mota laran.
Daudaun ne’e família sira husi matebian nian lori ona matebian nia isin-mate bá nia rezidénsia iha Suku Uma-Tolu hodi hala’o prosesu fúnebre.
Entretantu, matebian ne’e ho naran Idelfonso Soares (37) no oan hamutuk na’in-lima.
Jornalista: Vitorino Lopes da Costa
Editór: Xisto Freitas da Piedade
