DILI, 23 Fevereiru 2026 (TATOLI)-Diretór-Ezekutivu Asosiasaun Defisiénsia Timor-Leste (ADTL), Cesário da Silva, sujere ba Komisaun Funsaun Públika (KFP) no liña ministeriál sira atu fó prioridade kuota mós ba Ema ho Defisiénsia (EhD) hodi partisipa iha vaga rekrutamentu sira iha administrasaun públika.
Tanba tuir ADTL nia akompañamentu, EhD nia asesu ba empregu formál nian sei menus tebes, maski politikamente Governu hahú hatuur klaru prioridade ba asesu inkluzivu ba ema hothotu, maibé realidade EhD iha interasaun mosu dezafiu oioin hodi impede sira-nia partisipasaun.
Tuir nia, dezafiu hanesan fíziku iha edifísiu públiku sira kuaze barak liu labele asesu ho di’ak iha komponente barak. No prespetiva ema nian nafatin de’it ba EhD hanesan karitativa, no hanoin kondisaun saúde ho fíziku no mentál, entaun presiza empodera akomodaun razoavel, atu kria kondisaun hodi asegura bele asesu ho di’ak no independente.
“Tanba ne’e, ita rekomenda ba Governu atu konsidera kuota ba rekrutamentu, pur ezemplu iha rekrutamentu ba ministériu ida halo ba ema na’in-10, vaga ida fó ba ema ho defisiénsia ida, nune’e sira atu kompete, parte ida husi ekuidade nian”, nia hateten ba Tatoli iha knaar fatin, iha Maskardeña, Dili.
ADTL ninia preparasaun ein termu rekursu umanu ba EhD durante ne’e parseria ho entidade oioin hanesan Ministériu Ensinu Superiór Siénsia no Kultura (MESSK), liuhusi Universidade Nasionál Timor Lorosa’e (UNTL) hodi haruka EhD ba eskola kada tinan atu aumenta sira-nia koñesimentu.
Aleinde ne’e, ADTL ho nia membru fó formasaun ba EhD atu prepara sira hatete kona-ba lee, hakerek no bele tama iha estudu formál no la’ós formál sira.
“Iha ne’e, kapasitasaun ne’ebé ADTL halo, iha mós prepara ba postu traballu, entaun sira remata ona mai fali organizasaun halo prátika serbisu to’o fulan neen, bele tulun abitua an ba serbisu profisionál nian”, dehan.
Hatán ba kestaun ne’e, Prezidente Komisaun Funsaun Públika (KFP), Agostinho Letêncio de Deus, dehan KFP seidauk iha dadus detallu ba EhD, maibé rekoñese númeru menus. Tanba ne’e, KFP agora foku dahuluk haree ba ekipamentu ba ema hotu ho kondisaun saida de’it bele asesu, hanesan E-Recruitment Building ne’ebé foin hala’o hodi ema hotu asesu ho idaidak ninia kondisaun, no hahú ona diskute kona-ba dijitál ne’ebé própriu ba EhD.
“Husi ne’e mak ita bele haree, asesu tiha ona, maibé depois serve atu serbisu iha ida ne’ebé. Ho ida-ne’e mak ita foin haree fali ba ida-ne’e, maibé dalabarak ita tenke nota katak, ema idaidak ho kondisaun saida de’it mak nia enfrenta, maibé bainhira nia hanoin atu serbisu fiar nia bele. Entaun, ho hanoin ida hanesan ne’e mak importante kria fasilidade”, katak.
Jornalista: Nelson de Sousa
Editora: Maria Auxiliadora
