DILI, 23 Fevereiru 2026 (TATOLI)–Sekretariu Jerál Federasaun Karaté-do Timor-Leste (FKTL), António Carlos de Araujo, hateten iha tinan 2026 Ministériu Juventude Desportu Arte no Kultura (MJDAK) sei aloka osan hamutuk $70.000 ba sira atu realiza atividade rua (2).
“Iha tinan ida-ne’e ami agradese tanba Governu bele aloka osan boot uitoan mai ami. Kompara ho tinan sira liu ba, osan mai ami ne’e uitoan de’it. Governu rasik hatudu ona osan nia montante mai ami, entaun ami halo hela preparasaun atu realiza atividade boot rua (2),” Sekretariu Jerál ne’e hateten ba Agência TATOLI iha Salaun Xanana Sport Centre, segunda ne’e.
Nia dehan, atividade rua (2) ne’ebé atu realiza mak ida iha fulan-Marsu ne’e realiza Kopa Xanana senior, no ida fali espesifiku ba juniór ho naran hanesan Kopa Xanana sei realiza iha fulan-Jullu hodi prepara ba jogu Komunidade Nasaun Sira Ko’alia Lian Portugés (CPLP-sigla Portugés) 2027 iha Brazíl.
“Agora ami halo kontaktu ona ba munisípiu sira hodi prepara sira-nia atleta mai kompete iha eventu rua (2) ne’e. Haree ba orsamentu ne’ebé boot, ba atividade rua ne’e kada munisípiu sei mai ho sira-nia atleta hamutuk 12 no ita sei prepara premiu di’ak ba sira. Atividade ne’e atu tais mós atleta ne’ebé di’ak, ita hili ba selesaun nasionál,” Carlos hateten.
Nia hatutan, atividade rua (2) ne’e sei halao hotu iha Jináziu Munisipál Dili no atleta sira-ne’ebé husi Munisípiu konsentra antes loron rua atividade hala’o.
Tuir dadus ne’ebé iha, totál atleta Karaté-do ne’ebé selesionadu ba selesaun nasionál hamutuk 500-resin, nune’e totál atleta iha munisípiu hotu hamutuk 7.000-resin.
Jornalista : Hortencio Sanchez
Editór : Cancio Ximenes
