DILI, 24 Fevereiru 2026 (TATOLI)—Autoridade Inspesaun Fiskalizasaun Atividade Ekonómika Sanitária Alimentár (AIFAESA) deteta supermerkadu Meimart komete infrasaun tanba falsifika data validade produsaun manu-tolun hodi kontinua faan ba konsumidór sira.
Diretora Departamentu Operasaun, Claudinha Soares Pinto, hateten iha loron segunda feira ne’e hafoin hetan keixa husi komunidade kona-ba manu-tolun espira ne’ebé sosa iha supermerkadu Meimart Fatuhada, nune’e sira fahe kedas ekipa ba parte lima hodi halo imspesaun espesífiku de’it ba manu-tolun ne’ebé faan iha sukursál (cabang) loja Meimart nian.
“Infelizmente ami hetan keixa ne’e relativamente ho manu-tolun sira-ne’ebé estragadu. Entaun, ohin, ekipa sira halo inspesaun no ita ita deteta katak manu-tolun ho kondisaun ne’ebé komunidade kestiona ne’e laiha, Maibé, iha fali deskobrementu foun ida mak falsifikasaun manu-tolun nia data validade produsaun ne’ebé la hanesan ho data orijen importa mai, ne’e sei afeta ba kondisaun produtu refere,” Dirijente ne’e informa ba jornalista sira iha nia kna’ar fatin, Matadoru, ohin.
Signifika, nia dehan, ida-ne’e konsidera hanesan mós krime no sira junta hamutuk ho parte seguransa nian, nune’e bele foti asaun ba supermerkadu refere. Tanba, prosesu kontra ordenasaun ba iha falsifikasaun produtu ka prolonga data espiradu AIFAESA kontinua halo atuasaun bazeia ba lei no produtu hirak ne’e, sira aprendee ona hodi halo destroisaun iha lixeiru Tibar.
Entaun, nia dehan, manu-tolun ho nia markasaun tipu no medida lahanesan iha raak boot hamutuk 78 no rak ki’ik iha 168 ne’ebé ita foti iha supermerkadu Meimart-Fatuhada. Produtu sira-ne’e rekolla hotu para sai evidénsia ba prosesa kontra ordenasaun hasoru empreza ne’ebé komete infrasaun refere.
“Maske loja na’in deklara katak kauza ne’e tanba kestaun téknika husi ninia traballadór sira-ne’ebé hakerek data sala, maibé bazeia ba dekretu-lei nú. 43/2023 ko’alia kona-ba tipu infrasaun. Entaun, ita ketegoria infrasaun ne’e bazeia ba dekretu-lei refere, nune’e ida-ne’e hanesan erru ida ba empreza tanba tau fali data validade produsaun lahanesan ho importasaun orijin husi Malázia,” nia dehan.
Aleinde ne’e, nia afirma ohin ko’alia ona ho responsável ba estabelesimentu atu tau atensaun no sira mós rekoñese hanesan erru ida maibé AIFAESA konsidera komete infrasaun, enkuantu AIFAESA nia atividade inspesaun la’ós de’it ba loja Meimart maibé mós ba operadór ekonómiku sira seluk.
Tanba ne’e, nia husu ba operadór ekonómiku sira hotu atu kumpre rekezitu ne’ebé AIFAESA estabelese ona.
Jornalista : Alexandra da Costa
Editór : Cancio Ximenes
