DILI, 24 Fevereiru 2026 (TATOLI)—Ministériu Turizmu no Ambiente liuhusi Xefe Departamentu Turismu Komunitáriu, Moises Tilman, informa konstrusaun turizmu komunitária iha Fleixa, Suku Aitutu, Munisípiu Ainaru ne’e atinjeona 50%.
Xefe Departamentu Turizmu Komunitáriu, Moises Tilman, hateten konstrusaun sítiu turístiku ne’e kontinuasaun ba obra iha tinan kotuk nian ne’ebé mak uza orsamentu husi programa kapitál dezemvolvimentu nian ho montante hamutuk $388,105.63.
“Obra ne’e ezekuta iha fulan klaran tinan 2025, entaun atraza uitoan tanba klima ne’e mak agora daudaun foin atinje 50%. Semana kotuk, ami foin halo monitorizasaun hatudu katak atividade la’o nafatin maske iha difikuldade, maibé bainhira la udan empreza kontinua servisu maibé karik udan ne’e sira la servisu,” Xefe Departamentu ne’e informa ba Agência Tatoli iha nia kna’ar fatin, Vila Verde, ohin.
Aleinde ne’e, nia dehan, prosesu implementasaun tarde ne’e tanba diálogu ho komunidade, tanba iha komunidade balun impede dehan nia mak na’in ba rai, nune’e sira servisu hamutuk ho SEATOU, Terra Propriedade no autoridade lokál hodi define loloos problema ida-ne’e no konsege rezolve duni.
“Tanba tuir intervensaun husi SEATOU katak fatin ne’e espasu públiku, entaun presiza hadi’a hodi fó asesibilidade ba ema hotu ne’ebé ultrapasa ba Ainaru no Kovalima. Nune’e, fatin ne’e hadi’a hotu, ami sei entrega ba komunidade ne’ebé durante ne’e autoriza hela fatin refere no sei fó formasaun ba sira hodi jere ho di’ak,” nia dehan.
Konstrusaun obra ne’e rasik mak hanesan kafetária unidade boot ida, toilet ka sanitáriu públiku, postu polísia ida, jardin, inklui baraka unidade 22 no agora konsege kontrui ona baraka 18, tanba kontratu ita aumenta tan fulan neen (6) ba empreza sira-ne’ebé kaer obra ne’e.
Entretantu, nia informa, kona-ba proposta husi komunidade ne’ebé atu konstrui turizmu komunitária, ami seidauk rejistu ba pedidu hirak ne’e, husi munisípiu no grupu ne’ebé de’it,” nia informa.
Projetu konstrusaun turizmu komunitária iha Fleixa fahe ba pakote tolu no implementa husi empreza Watusili Unipesoál, Lda, Redi Equipament and Construction Unipesoál Lda no Den Bibar Unipesoál, Lda.
Jornalista : Alexandra da Costa
Editór : Cancio Ximenes
