DILI, 24 Fevereiru 2026 (TATOLI)—Polísia Sientífika Investigasaun Kriminál (PCIC, sigla portugéz), iha tuku 07:00 dadeer, asegura sidadaun ho inisiál JMR hodi halo identifikasaun tanba deskonfia halo atividade burla hodi habosok ema bá serbisu iha Austrália.
JMR liuhusi nia atividade konsege bosok vítima sira hanesan NS no IFX.
Suspeitu JMR promete ba vitíma sira atu halo viajen bá Austrália iha loron 15 Fevereiru 2026, maibé depois nia halo fali aliña seluk ida, nia promete tan ba vítima adia ba loron 19 Fevereiru 2026 maka sei arranka bá Austrália maibé la akontese.
Relasiona ho kazu ne’e, ekipa investigasaun husu ba Ministra Solidarisade Sosiál no Inkluzaun, Verónica das Dores no nia parte konfirma katak la’ós nia oan maka suspeitu JMR, maibé suspeitu maka utiliza meiu katak nia nu’udar oan husi membru Governu ne’e hodi konvense vitíma sira ba halo tratamentu dokumentu hodi bá serbisu iha estranjeiru.
Ekipa Informasaun PCIC ho kolaborasaun Eskuadra Dom Aleixo, buka tuir paradeiru suspeitu JMR no iha tuku 07:40 iha Suku Bairru Pité, identifika JMR ne’ebé aluga no lori karreta Mazda Demio ho númeru matríkula A 28 487, nune’e, ekipa rekolla no konsege buka tuir duni karreta na’in no bele identifika JMR nia paradeiru.
Portavós PCIC, Investigadór Xefe Mário Tavares, hateten, bainhira PCIC hala’o serbisu iha terrenu durante semana ida nia laran, konsege halo indentifikasaun ba suspeitu JRM, hahú ninia modu operandu liuhusi publikasaun iha Tiktok no konvense vítima sira atubele entrega osan balun ba nia atu trata dokumentu.
“Informa komunidade no sosiedade sira katak Servisu Informasaun Judisiál PCIC nian, iha terrenu halo atividade hodi tuir suspeitu JMR ne’ebé mak alegadamente halo atividade burla atu lori vítima sira bá serbisu iha Austrália no vítima sira hetan prejuizu ho montante $11.000,” Portavós hato’o ba Jornalista sira iha ninia knaar fatin, edifísiu PCIC, Kolmera, Tersa ne’e.
Notísia relevante : MP kontinua investiga kazu ilísitu no burla informátika iha Oekusi
Suspeitu JMR halo modu operandu no iha modu oinoin atu atrai vítima sira. Nia konfesa nia-an hanesan médiku ida iha Hospital Nacional Guido Valadares.
“Ekipa konsege halo konfirmasaun ho médiku ne’ebé maka suspeitu utiliza nia naran. Médiku ne’e iha duni maibé la’ós médiku ne’e mak halo modu operandu iha rede sosiál. Nune’e mós suspeitu JMR ne’e konvense vítima sira hodi hateten katak nia hanesan Polísia Militár ne’ebé mak halo rekrutamentu bá serbisu iha Austrália, maibé depois Autoridade Judisiál liuhusi Servisu Informasaun PCIC halo konfirmasaun suspeitu JMR la’ós membru husi Forsa Defeza,” nia informa.
Suspeitu JMR deklara nia-an nu’udar membru Governu nia oan hodi fó garantia ba vitíma sira hodi bele halo tratamentu dokumentu serbisu iha Austrália.
“Suspeitu lohi vitíma sira katak nia hanesan oan husi Membru Govenrnu ida, ne’ebé hala’o serbisu hanesan membru Governu nia oan nia maka halo serbisu ba membru Governu referidu, tanba hatan konfiansa ita-nia na’i ulun Polítika sira, suspeitu ne’e garantia ba vitíma sira katak nia bele haruka ona bá serbisu iha Austrália,” nia katak.
Hafoin halo identifikasaun naruk desde Segunda kalan, suspeitu utiliza karreta uza karreta aluga maski iha karreta rasik tanba nia motivu mak atu dezvia prosesu identikasaun.
“PCIC foti Suspeitu bazeia b keixa husi komunidade, bainhira keixa tama, Polísia halo tratamentu no verifikasaun informasaun, buka tuir dadus ne’ebé iha, inklui rekolla informasaun kona-ba suspeitu JMR konversa ho vítima sira,” nia informa.
PCIC agora asegura karreta ne’ebé JMR utiliza nu’udar evidénsia. Vítima sira mós aprezenta prova ne’ebé hatudu katak suspeitu promete buat balu ba sira no sasin husi vítima rasik mak hato’o keixa hasoru suspeitu.
“Tuir prosedimentu prosesuál, PCIC sei hala’o prosesu identifikasaun no prosesu ida-ne’e tenke kumpre antes oras 12 hodi halo identifikasaun ba nia, nunee bele garante legalidade no direitu hotu-hotu,” Portavós katak.
Maski nune’e, PCIC fiar katak iha ona vítima barak no suspeitu ne’e la la’o mesak maibé iha rede ne’ebé serbisu hamutuk ho nia. Tanba ne’e, PCIC sei halo auto partisipasaun ba Ministériu Públiku hodi hala’o atuasaun ba inkéritu.
Mário dehan, maski nune’e la taka dalan ba PCIC nia serbisu atu rekolla informasaun no prova seluk hodi submete nafatin ba autoridade kompetente.
“Bainhira prosesu inkéritu loke ona maka investigasaun sei kontinua nafatin, tanba kestaun ida-ne’e envolve serbisu rede ne’ebé utiliza média sira atu konvense komunidade liuhusi modu operandu burla,” Portavós esplika.
Jornalista : Natalino Costa
Editora : Julia Chatarina
