DILI, 24 Fevereiru 2026 (TATOLI)—Servisu Migrsaun hamutuk ho Polísia Nasionál Timor-Leste (PNTL) koordena serbisu ho Autoridade Atambua, Indonézia konsege haruka fila sidadaun Indonézia ida ho inisiál FRCM, ho idade 21 bá nia nasaun orijen.
Autoridade Servisu Migrasaun no PNTL lori FRCM hodi bá entrega iha fronteira Mota-Ain, Indonézia ho koordenasaun no serbisu hamutuk ho Autoridade Mota-Ain no no Autoridade Polísia.
FRCM suspeitadu ba kazu violasaun sexuál hasoru sidaun feto Indonézia ida ho inisial K, ho idade 17, iha Atambua iha fulan kotuk.
Nune’e, iha loron 23 Fevereiru 2026 suspeitu ne’e halai husi Atambua Belu liuhusi dalan ilegál mai Timor-Leste hodi mai subar iha Tasi-Tolu, Postu Administrativu Dom Aleixo, Munisípiu Dili.
Notísia relevante : Servisu Migrasaun forma ekipa investiga membru suspeitadu fasilita sidadaun Indonézia over stay
Hafoin suspeitu halai sai husi Indonézia mai Timor-Leste hodi hakat fronteira terrestre liu dalan ilegál, Autoridade Seguransa Indonézia Nusa Tenggara Timur (NTT) halo kedas koordenasaun intensivu ho Komandu Jerál PNTL liuhusi Diresaun Nasionál Servisu Informasaun Polísia no menus husi loron-tolu, suspeitu ne’e hetan kapturasaun iha rezidénsia família iha área Tasi-Tolu no entrega kedas ba Servisu Migrasaun hodi halo idenitfikasaun.
“Iha prosesu identifikasaun, Suspeitu FRCM hela iha kampung Halirem, Desa Lirak, Kecamatan Atambua Selatan, Kabupaten Belu, halai mai Timor iha loron 29 Janeiru no hetan kapturasaun husi PNTL iha loron 23 Fevereiru 2026,” referidu nota husi Autoridade Seguransa ne’ebé Ajénsia TATOLI sita.
Bazeia ba kooperasaun di’ak entre Autoridade Seguransa Indonézia no PNTL, ohin loron tersa 24 fevereiru tinan 2026 Servisu Migrasaun Timor-Leste ofisialmente entrega hikas suspeitu ne’e ba Migrasaun Indonezia nian iha Batugade hodi submete ba prosesu investigasaun.
Prosesu haruka fila sidadaun Indonézia ne’e lidera husi Diretór Jeral Servisu Operasaun no hetan mós akompañamentu hosi Adidu Seguransa KBRI nian, Konsul Timor-Leste iha Kupang, Adidu Migrasaun iha Atambua, Komandante UPF nomos Komandante Postu Servisu Migrasaun Batugade.
Jornalista : Natalino Costa
Editora : Julia Chatarina
