VIKEKE, 24 Fevereiru 2026 (TATOLI)—Xefe Departamentu Veterináriu Munisípiu Vikeke, Domingos do Carmo Pinto, hateten Diresaun Veterinária Munisípiu Vikeke daudaun ne’e menus rekursu hodi difikulta halo tratamentu ba komunidade nia animál.
“Daudaun ne’e ami sei menus hela rekursu tanba ami-nia veterináriu na’in-lima (5) seidauk asina kontratu. Nune’e, agora ami menus funsionáriu hodi halo tratamentu ba komunidade nia animál ne’ebé moras,” Domingos do Carmo Pinto hateten ba TATOLI iha Postu Vikeke Vila, Tersa ne’e.
Nia informa bainhira veterináriu sira-ne’e asina tiha kontratu hafoin bele servisu fó vasina ba komunidade nia balada.
Veterináriu na’in-lima ne’ebé seidauk asina kontratu ne’e kompostu husi Postu Lakluta na’in-ida (1), Uatulari na’in-tolu (3) no Uatukarbau na’in-ida (1). Daudaun ne’e, funsionáriu atuál hela na’in-sanulu (10) halo servisu fó vasina balada.
Hela postu haat ne’ebé seidauk implementa vasina kontra raiva kompostu husi Postu Uatulari, Uatukarbau, Ossu no Vikeke Vila iha suku ualu (8) mak seidauk implementa vasina.
Jornalista: Vitorino Lopes da Costa
Editór: Xisto Freitas da Piedade
