DILI, 25 Fevereiru 2026 (TATOLI)—Autoridade Munisipál Baukau (AMB) liuhosi reuniaun Konsellu Koordenasaun Munisipál (KKM), Tersa (24/02), diskute programa lima ne’ebé sai prioridade iha Baukau.
Prezidente Autoridade Munisipál (PAM) Baukau, Veneranda Eurico Lemos Martins, husu ba kargu xefia inklui lideransa komunitária hotu atu kontinua serbisu hamutuk hodi kontribui ba dezenvolvementu iha territóriu Baukau.
“Ne’e la’ós responsabilidade ema ida nian de’it maibé responsabilidade ita hotu nian,” Veneranda Lemos hateten liuhosi komunikadu imprensa ne’ebé TATOLI asesu, Kuarta ne’e.
Iha reuniaun referida, membru asembleia diskute kona-ba dezenvolvimentu no programa iha Munisípiu Baukau ho programa lima hanesan aprezenta lista rejistu patromóniu lojistiku (bens moveis no imoveis), planu munisipál ba formasaun rekursu umanu, sumáriu planu estratéjiku dezenvolvimentu Munisipál Baucau, lista prioridade Programa Nasionál Dezenvolvimentu Suku (PNDS) tinan 2026-2027 no aprezentasaun dadus eleitorál.
Veneranda konsidera autoridade lokál presiza hola-parte iha prosesu administrasaun ninian iha munisípiu, iha-ne’ebé liuhusi KKM bele loke oportunidade ba delegasaun territoriál sira atu hato’o programa, atinjimentu no konstranjimentu iha prosesu administrasaun no prosesu atendimentu públiku.
Entretantu, reuniaun KKM bazeia ba Dekretu-Lei númeru 3/2020, artigu 22 to’o 31 no Dekretu-Lei númeru 3/2016, artigu 4 to’o 44 ne’ebé ho totál membru 64 kompostu PAM, sekretáriu munisipál, diretór serbisu munisipál, administradór postu no autoridade suku sira.
Jornalista: Natalino Belo
Editór: Xisto Freitas da Piedade
