DILI, 25 Fevereiru 2026 (TATOLI)—Governu liuhusi Autoridade Nasionál Komunikasaun (ANC, sigla portugés) delibera no aprova akizisaun asaun 57,06% ba empreza Esperansa Timor Oan, Lda (ETO) hodi kontinua sai asionista másimu ba operadór komunikasaun Timor Telecom S.A.
Prezidente Autoridade Nasionál Komunikasaun, Flávio Cardoso Neves, hateten bazeia ba komunikadu imprensa ne’é públika, ANC pronúnsia katak prosesu akizisaun asaun ka asionista másimu 57,06% ba empreza ETO hodi lidera, maibé nia servisu hamutuk pakote ida ho empreza haat hanesan Fundasaun Oriente, PT. Partisipasaun SGPS, S.A, Hari’i Sosiedade Dezenvolvimentu Timor-Leste, SGPS, S.A no Portugál Telecom International Finance.
“Tanba bazeia ba akizisaun persentajen husi operadór Timor Telecom, empreza ETO aas liu kompara ho Governu ne’ebé iha de’it 20,5%, Vodatel Makau iha 17,86% no jerente Júlio Alfaro iha akizisaun 4,49%, entaun agora ba oin ETO mak sei halo kontrola másimu tanba nia sosa ona ho pursentu boot husi kompañia anteriór OI Brazíl,” Prezidente ANC ne’e informa ba jornalista sira iha nia kna’ar fatin, Kaikoli, ohin.
Dirijente ne’e dehan, prosesu akizisaun tenke liuhusi aprovasaun ANC tanba bazeia ba Dekretu-Lei nú. 15/2012 iha alterasaun 31/2024, katak kualker akizisaun liuhusi millaun $10 ba leten tenke hetan aprovasaun iha ANC.
“Tanba ne’e ANC mós halo konsultasaun ho parte importante sira hanesan Ministériu Finansa, Ministériu Transporte Komunikasaun no Mobile Network Operator (MNO) tolu mak Telemor, Timor Telecom, Telkomsel, nune’e prosesu akizisaun sira sei tuir nafatin prinsípiu kompetisaun livre iha merkadu no prinsípiu libertasaun setór telekomunikasaun,” nia dehan.
Nune’e, nia dehan, husi konsulta públika ne’e sira haree katak laiha ezebisaun tanba ne’e liga liu ba komersiál, entaun kompeténsia husi empreza hirak ne’e rasik, tanba ne’e iha 23 Fevereiru ne’e, Konsellu Administrativa halo reuniaun hodi aprova no deside ETO ho nia parseriu sira mak sai asasionista másimu ba operadór Timor Telecom.
“Kona-ba razaun tanbasá mak kompañia hakarak faan ba ETO no ho montante hira ne’e asuntu komersiál entre kompañia sira mak hatene, enkuantu ANC ne’e hanesan orgaun reguladora ida-ne’ebé fasilita aprovasaun husi Governu ba operadór sira telekomunikasaun sira-ne’ebé submete pedidu mai ANC hodi haree,” nia esplika.
Enkuantu prosesu atu alkansa to’o etapa ida-ne’e la fasíl no konkursu ne’e livre ba ema hotu hakarak kompete, entaun iha etapa ne’e empreza ETO mak iha inisiativa ne’ebé sériu hodi konklui no hetan akizisaun ida-ne’e, maibé ETO sei halo planu kurtu prazu hodi submete ba ANC hodi haree ba mekanizmu inovasaun ne’ebé sira prepara, signifika la afeta ba operasaun maibé iha nivel jestaun.
“Tanba ne’e, ho mudansa ida-ne’e, ita fiar katak ho envolvinentu timoroan sira iha setór telekomunikasaun bele fó asisténsia ho di’ak ba komunidade no promove setór ida-ne’e ba oin,” nia dehan.
Jornalista : Alexandra da Costa
Editór : Cancio Ximenes
