VIKEKE, 25 Fevereiru 2026 (TATOLI)–Komisaun Nasionál Eleisaun (CNE-sigla portugeza) liuhusi programa edukasaun sívika sosializa eleisaun munisipál ba partidu polítiku sira-ne’ebé rejistadu hodi prepara ba eleisaun Kámara Munisipál Vikeke.
Iha konsolidasaun ne’e, Prezidente CNE, José Agostinho da Costa Belo Pereira, haktuir programa edukasaun sívika ne’e uluk prioriza ba partidu polítiku sira-ne’ebé asentu iha Parlamentu Nasionál, maibé agora CNE nakloke fali ba partidu sira-ne’ebé rejistadu ona iha Timor-Leste.
“Ohin ita aprezenta kona-ba regra no prosesu sira kona-ba eleisaun munisipál no kandidatu prezidente, vise prezidente no deputadu asembleia munisipál. Tanba eleisaun munisipál sei mai no autór ba eleisaun munisipál ne’e mak partidu polítiku sira. Tan ne’e, partidu polítiku sira sai hanesan parte ida importante iha nasaun demokrasia, tanba demokrasia sai hanesan instrumentu importante hodi kondús rai ne’e ba futuru,” Prezidente CNE hateten iha abertura edukasaun sívika ho tema “Konsolida demokrátika no integridade eleisaun” iha salaun Administrativu Vikeke, Tersa (24/02).
José esplika eleisaun munisipal bazeia lei munisipiu ne’ebé hetan aprova iha tinan kotuk mak hanesan lei númeru 22/2021 kona-ba Lei Eleitorál no lei númeru 23/2021 kona-ba Lei Podér Lokal no Desentralizasaun Administrativa.
Iha fatin hanesan, Prezidente Autoridade Munisípiu Vikeke, Francisco C. S. de G. Soares, hateten edukasun sívika sai importante ba sosiedade sira atubele komprende kona-ba preparasaun eleisaun munisipál.
Aleinde ne’e, reprezentante Partidu FRETILIN Munisípiu Vikeke, José Muda da Cruz, hato’o agradese ba CNE ne’ebé konsege implementa edukasaun sívika kona-ba konsolida demokrátika no integridade eleisaun ba partidu polítiku sira iha Munisípiu Vikeke.
Iha programa edukasaun sívika ne’e partisipa másimu husi militante sira hanesan partidu CNRT, FRETILIN, PD, KHUNTO, PLP, PUD, OS Verdes, PR, Komandante Polísia Nasionál Timor-Leste (PNTL) Munisipiu Vikeke. Konsolidasaun ne’e durante loron ida.
Jornalista: Vitorino Lopes da Costa
Editór: Xisto Freitas da Piedade
