DILI, 25 Fevereiru 2026 (TATOLI)—Diretór Ezekutivu Ospitál Referál Maubisse, Virgílo Mendonça Pereira, husu Ministériu Saúde tenke konsistente la’os haruka de’it profisionál saúde sira iha nasionál maibé haruka mós profisionál saúde iha ospitál referál atu hala’o estudu iha rai-li’ur.
“Bainhira ita-boot sira hili malu haruka ba eskola, ne’e hili malu iha nasionál de’it. Ne’e atu hateten saida, atu fó hanoin ba ita, tanba ita-boot sira iha nasionál ne’e katak oinsá ko’alia ho ita-nia na’in ulun sira, atu haruka ka kapasita ema ba eskola atu mai prienxe tuir fatin sira-ne’ebé mak ita presiza ne’e tenke konsistente,” Virgílo Mendonca Pereira hateten ba jornalista sira hafoin partisipa iha Workshop Nasionál ba implementasaun planu estratéjiku ba ospitál sira iha tinan 2026-2030 iha Novu turizmu, ohin.
Nia hatutan, kona-ba rekursu umanu liuliu sira-ne’ebé mak koloka iha ospitál rejionál, atu prienxe ninian nesidade sira iha ospitál, maibé tenke prienxe mós saida mak ospitál rejionál nia planu, maibé ospitál referál sira la’ós otónomu atu bele halo reklamasaun mesak ba profisionál saúde sira.
“Uluk karik ha’u hanesan Diretór klínika ha’u sempre hakilar beibeik, atu hateten de’it saida karik rekursu umanu tenke hatene ami la’ós otónomu, atu ami bele halo rekrutamentu mesak ba ami-nia rekursu umanu. Loloos ne’e ita-boot sira mak hatete liu ona, dehan ospitál referál hanesan Maubisse ne’e, nia presiza médiku hira, enfermeiru hira, parteira hira no tékniku aliadu hira ne’e, ita-boot sira iha mapeamentu kompletu tiha ona. Mmaibé ita-boot sira lae husu fali mai ami mak fó,” nia dehan.
Maibé, nia hato’o agradesimentu ba planu estratéjia ne’ebé mak oras daudaun iha ne’e atu bele implementa iha ospitál referál iha futuru mai, katak sira-ne’ebé mak ba tiha ona Cuba ne’e planu katak ema ne’ebé atu mai ne’e tenke mai husi referál sira ho hanoin ida katak sira fila mai karik ba servisu iha ospitál, maibé derpente to’o mai foti de’it ema husi Ospitál Nasionál Guido Valadares mak ba.
Nia afirma, ohin ko’alia ne’e sita liu ba rekursu umanu, buat ne’ebé mak atu ko’alia ne’e la’ós repetisaun tanba antes mós kada ospitál ko’alia no iha buat lima ne’ebé mak importante mak osan, edifisu, rekursu umanu, médikamentu, ekipamentu médiku ne’e tenke kompletu.
“Pelumenus ha’u haree iha parte rekursu umanu ne’e ko’alia nune’e. Se ita ko’alia koloka médiku sira hanesan ohin dehan ne’e, tenke koloka ba iha espesiál baze ha’at ne’ebé mak durante ospitál referál sira iha ne’e. Atu koloka ba ne’e, depois buat ida mak tenke tau atensaun,” nia esplika.
Nia informa, ohin iha vise Ministru hateten katak planu sira la’ó atu redús traferénsia maibé rasionál ne’e mak importante.
“Ha’u sita liafuan ida vise ministru hateten la’ós de’it atu redús transferénsia ne’e, maibé rasionál ne’e mak importante. Buat ida ohin ha’u hateten pontu lima ne’e importante tebes, ida ne’e durante ne’e ha’u la haree,” nia dehan.
Diretór Jerál Servisu Ospitálar iha Ministériu Saúde, Raimundo do Santos, dehan kada departamentu ida-idak iha ospitál munisípiu ka ospitál rejionál sira-ne’e importante tebes hodi bele prepara sira, hodi nune’e espesilista sira-ne’e mak servisu hamutuk fulan neen ka tinan ida to’o tinan rua, bainhira iha bolsa estudu sira-ne’e mosu iha obrigasaun atu prepara karta rekomdasaun ida.
Tanba ne’e, husu ba ospitál referál liuhusi dirijente sira no xefe departamentu mak besik liu atu bele reforsa ida-ne’e iha sira-nia servisu fatin.
“Maibé atu halo planu sira-ne’e ho susesu la’ós husi leten de’it, maibé husi karik mós tenke halo barullu beibeik katak ami mós presiza ida-ne’e. Rekomendasaun no reforsa husi karik sa’e mai depois planu sira ba, entaun ita bele aliña ho mapamemtu ne’ebé mak iha,” nia hateten.
Jornalista : Felicidade Ximenes
Editór : Cancio Ximenes
