DNTT-PNTL halo operasaun konjunta garante ordenamentu estasionamentu iha loja sira
DILI, 25 Fevereiru 2026 (TATOLI)—Diresaun Nasional Transporte Terrestre (DNTT) hamutuk ho Polísia Nasionál Timor-Leste liuhusi Diresaun Tránzitu Seguransa Rodoviária, halo operasaun konjunta hodi garante ordenamentu estasionamentu iha loja sira iha kapitál Dili hodi hamenus engrafamentu.
Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, hateten atividade sirkulár konjunta ida-ne’ebé DNTT no Polísia Tránzitu públika ho objetivu atu halo kontrolasaun ba loja sira-ne’ebé haruka ona sira-nia traballadór 200-resin tuir formasaun husi Polísia Tránzitu iha tinan 2025 kona-ba jestaun seguransa iha ida-idak nia estasionamentu loja nian.
“Katak loja-na’in sira implementa duni ka lae, tanba bazeia ba ami-nia observasaun iha terrenu engrafamentu kontinua akontese iha loja sira, ne’ebé ladun halo jestaun di’ak ba veíkulu sira-ne’ebé para iha loja bainhira atu ba sosa sasán ruma,” Xefe Departamentu informa ba Agência Tatol, iha nia kna’ar fatin, Balide, ohin.
Nia dehan, DNTT servisu hamutuk ho PNTL hodi hasai nota informativu atu fó hanoin fali ba loja-na’in sira hodi implementa ona regra ne’ebé mak sira aprende. Katak, sira tenke kria ona sira-nia estasionamentu iha loja oin atu veíkulu bele para tuir estasionamentu ne’ebé preparadu hodi hamenus engrafamentu iha espasu públiku.
“Maibé bainhira loja-na’in sira lakohi koopera mak sei hetan sansaun no motorista ne’ebé la kumpre ka kontra orden autoridade mós sei selu ho montante $45 ne’e ba kualker veíkulu, loja na’in sei selu montante boot liu motorista, entaun orden sirkulár ida-ne’e sei foka ba estrada protokolu no públiku iha kapitál Dili. Maibé planeia sei sirkula to’o bairru sira, tanba komunidade balun para transporta iha estrada públiku no halo sai hanesan sira-nia barajen,” nia dehan.
Nia hatutan, bainhira nota informativu ne’e públika ona normalmente ekipa sei halo operasaun konjunta iha terrenu no atividade sirkulár ne’e laiha determinasaun tempu maibé kontinua implementa ba oin, nune’e husu ba sidadaun hotu atu kumpre orden sirkulár ida-ne’e labele para transporte iha espasu públikj hodi hamosu engarafamentu.
“Ami mós iha informasaun seluk ba motorista ho markasaun KLX, D-Tracker no Trail, sira tenke monta xapa matríkula motor ba nia fatin la’ós monta ba mesin okos, tanba se bainhira la kumpre sei multa $45,” nia informa.
Nune’e, nia husu ba sidadaun hotu kumpre tamba ekipa konjunta kontinua halo operasaun iha territóriu laran tomak, karik deteta pasiénsia tenke selu tuir orden autoridade labele inventa sasán sira tuir sira-nia hakarak tanba iha lei ne’ebé mak regula.
Jornalista : Alexandra da Costa
Editór : Cancio Ximenes
