DILI, 25 Fevereiru 2026 (TATOLI)—Emanuel Football Club (FC) sai obstákulu ba ekipa kampiaun Karketu Dili FC iha finál Tasa Liga Federasaun Futeból Timor-Leste (FFTL) 2025.
Durante kompetisaun LFTL, istorikamente ekipa rua hasoru-malu dala rua iha-ne’ebé Emanuel FC mak lidera head to head, manán ho skor 1-0 iha tinan 2023, no iha 2025 impata ho skor 0-0.
Maski nune’e, Emanuel FC liuhusi asistente treinadór, Van Basten, nafatin konsidera Karketu Dili FC nu’udár ekipa zigante ne’ebé aleinde jogadór no treinadór ne’ebé kualidade, maibé Emanuel FC fiar an tanba fatór istória iha pasadu sai mós determinasaun ba Emanuel FC kontra Karketu iha jogu finál ne’ebé sei realiza iha Estádiu Munisipál Dili, Sábadu (28/02/2026).
“Ho istória ida-ne’e hanesan pontu pozitivu mai ami-nia ekipa katak ami sei koko mantein maibé ami konsidera mós Karketu nu’udár mentál kampiaun,” Van Basten hateten iha Estádiu Munisipál Dili, Kuarta ne’e.
Basten relata konserteja Karketu Dili FC mai ho hanoin vigansa (balas dendam) ho istória ekipa rua kuandu kontra malu, maibé Emanuel sei difikulta Karketu Dili iha jogu finál Tasa Liga FFTL tanba mai ho misaun atu defende istória.
“Ami hakarak sai kampiaun bainhira kontra Karketu Dili FC iha finál ida-ne’e,” Van Basten argumenta.
Iha fatin hanesan, Kapitaun Karketu Dili FC, Olagar Xavier sei la influensiadu ho istória head to head entre ekipa rua, importante nu’udár jogadór sempre preparadu atu manán no sai kampiaun iha Tasa Liga FFTL bainhira kontra Emanuel FC.
“Agora duni ami prontu atu manán Emanuel no sai kampiaun. Istória ne’e pasadu no ami mai ho mentál atu hiit tasa iha finál,” Olagar Xavier promete.
Emanuel FC rasik hakat bá finál Tasa Liga FFTL hafoin sai vensedór iha Grupu A no manán Portu Taibessi iha meiu finál, enkuantu Karketu Dili FC reprezenta Grupu D no iha faze meiu finál gaña vitória ho agregadu 4-2 bainhira kontra Assalam iha meiu finál.
Entretantu, ekipa rua iha kompetisaun LFTL epoka 2025 rezulta Karketu Dili FC sai kampiaun ho diferente pontu tolu ho totál pontu 20, enkuantu Emanuel FC iha segunda klasifikasaun ho pontu 17 no pozisaun hanesan akontese mós iha epoka 2023 iha-ne’ebé Emanuel FC nafatin iha pozisaun daruak no Karketu Dili FC nu’udár kampiaun LFTL.
Jornalista: Natalino Belo
Editór: Xisto Freitas da Piedade
