DILI, 25 Fevereiru 2026 (TATOLI)—Selesaun Nasionál Futeból Timor-Leste sei hahú halo preparasaun relasiona ho jogu kualifikasaun Asian Football Confederation (AFC) Asian Cup 2027 hodi kontra Maldiva iha inisiu fulan-Marsu tinan ne’e.
Diretór Dezenvolvimentu Futeból no Selesaun Nasionál Federasaun Futeból Timor-Leste (FFTL), João Manico Amaral, esplika ekipa treinadór sei bolu jogadór sénior tantu rai-laran no rai-li’ur hafoin kompetisaun Tasa Liga FFTL ramata nune’e halo preparasaun antes dezloka ba Maldiva iha jogu ikus kualifikasaun Grupu A.
“Sei halo preparasaun iha Dili tanba ida-ne’e jogu ikus no la’ós ona jogu determinasaun,” João Manico Amarál informa ba TATOLI iha ninia kna’ar fatin, Bairros dos Grilos, Kuarta ne’e.
Manico relata FFTL sei haruka karta bá jogadór diáspora sira-ne’ebé iha rai-li’ur atu aranka mai Timor-Leste inkluindu jogadór timoroan sira-ne’ebé joga iha estranjeiru tuir regulamentu FIFA windows hanesan Gali Freitas, João Pedro no João Rangel.
“Ita hein lista ofisiál husi treinadór prinsipál antes halibur jogadór sira atu halo preparasaun,” Manico argumenta.
Timor-Leste gaña pontu tolu husi Maldiva iha jogu volta dahuluk ho skor 1-0 ne’ebé hala’o iha Darwin-Austrália iha Juñu 2025 iha-ne’ebé tuir tabela klasifikasaun Lafaek rasik okupa iha pozisaun datoluk ho pontu tolu (3), rezultadu manán ida (1) no derrota dahaat (4) husi jogu lima (5).
Enkuantu, Tazaskistaun okupa iha pozisaun dahuluk ho pontu 13, Filipina iha pozisaun daruak ho pontu 13 no enkuantu Maldiva iha pozisaun ikus ho pontu 0 hafoin derrota jogu lima (5).
Tuir planu, selesaun nasionál sei dezloka ba Maldiva loron-lima antes iha-ne’ebé tuir oráriu jogu hala’o iha loron 31 Marsu.
Jornalista: Natalino Belo
Editór: Xisto Freitas da Piedade
