VIKEKE, 25 Fevereiru 2026 (TATOLI)—Reprezentante Frente Revolusionária Timor-Leste Independente (FRETILIN) iha Munisípiu Vikeke, José Muda da Cruz, solisita autoridade Munisípiu Vikeke aselera estabelese Balkaun Úniku nune’e populasaun sira bele asesu trata dokumentu.
“Ha’u hakarak husu autoridade munisípiu se bele aselera prosesu estabelesimentu Balkaun Úniku atu fasilita ita-nia populasaun asesu trata sira-nia dokumentu sira hanesan billete identidade (BI), sertidaun moris, kartaun eleitorál no dokumentu komersiál sira no seluk tan,” José Muda hateten iha salaun Munisípiu Vikeke, Kuarta ne’e.
Nia haktuir anteriormente autoridade munisipál identifika ona fatin ba Balkaun Úniku maibé to’o agora seidauk estabelesidu.
Hatán ba preokupasaun ne’e, Prezidente Autoridade Munisípiu Vikeke, Francisco C. S. de G. Soares, informa autoridade munisipál sei estabelese Balkaun Úniku iha tinan ne’e.
Notísia relevante: 2026, estabelese Balkaun Úniku iha Vikeke
“Ita identifika ona fatin iha antiga sekretariadu GIZ ne’ebé lokaliza iha Suku Karaubalu, Postu Vikeke. Ita halo de’it reabilitasaun ne’ebé sei realiza iha tinan ida-ne’e tanba fatin ita iha ona no hein prosesu implementasaun,” nia hato’o.
Francisco esplika prevee ona orsamentu hamutuk rihun $75 atu reabilita edifísiu referidu.
Tuir dadus, populasaun Munisipiu Vikeke hamutuk 102.637, kompostu husi postu lima (5) hanesan Lakluta, Uatukarbau, Ossu, Uatulari no Vikeke Vila.
Balkaun Úniku ba dahuluk estabelese iha Munisípiu Manatutu, Maiu 2024, iha Baukau iha Janeiru 2025 no iha Likisá iha 21 Fevereiru 2025, inaugura iha Dili iha 03 Abríl 2025 no inaugura iha Oekusi iha 19 Dezeembru 2025. Governu nia objetivu sei instala servisu Balkaun Úniku iha territóriu nasionál tomak to’o 2028.
Balkaun Úniku hanesan inovasaun ida iha fornesimentu informasaun no servisu públiku ba sidadaun sira no mós setór privadu sira. Ne’e hanesan modelu servisu foun ne’ebé oferese atensaun personalizada iha espasu fíziku ida-ne’ebé úniku iha nivel lokál.
Promove kultura inovadora iha prestasaun servisu ba administrasaun públika, ho objetivu redús burokrasia no korrupsaun, simplifika prosedimentu sira, aselera no moderniza prestasaun servisu públiku sira.
Iha ninia versaun dijitál, Balkaun Úniku hanesan fonte konfiavel ida no seguru ba asesu informasaun kona-ba prosedimentu ba asesu servisu públiku, konstitui hanesan feramenta importante ida ba transparénsia ativa.
Jornalista: Vitorino Lopes da Costa
Editór: Xisto Freitas da Piedade
