VIKEKE, 26 Fevereiru 2026 (TATOLI)—Komandante Autoridade Protesaun Sivíl (APC-sigla portugeza) Munisípiu Vikeke, Cirílio Soares Gomes, husu abintante sira iha Munisípiu Vikeke hadook an husi fatin sira-ne’ebé risku dezastre naturál liuliu mota atu labele afetadu ba risku sira.
“Daudaun ne’e tempu udan boot, tanba ne’e mak ha’u husu ba abintante sira tenke hadook an husi risku sira liuliu mota. Karik mota tun boot tenke hadook aan nune’e labele afeta ba ita-nia vida. Tanba iha semana kotuk ne’e, ita rejista mota lori ita-nia abitante ida lakon vida iha suku Uma-Tolu, postu Lakluta,” Cirílio ba TATOLI iha Postu Vikeke Vila, Kinta ne’e.
Komandante APC ne’e hateten relasiona ho akontesimentu mudansa klimátika (udan boot) agora daudaun ne’e Diresaun Nasionál Metereolojia Jeofízika partilla informasaun klima nian ba APC hodi fahe ba komunidade iha Munisípiu Vikeke.
Nia relata, área sira-ne’ebé APC identifika risku inundasaun mak iha área Olobai, Beloi husi Suku Karaubalu, área Uma-Boot, Suku Luka, Postu Vikeke Vila.
Entretantu, funsionáriu APC hamutuk na’in-16 no Bombeiru hamutuk na’in-17 ne’ebé daudaun ne’e ativa servisu ba atendimentu komunidade ne’ebé afeta ba dezastre naturál iha Munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
