DILI, 26 Fevereiru 2025 (TATOLI) – Diresaun Nasionál Kontrolu Poluisaun (DNKP), Ministériu Turizmu Ambiente, kontinua implementa kontrolu rigoriozu ba importasaun no produsaun plástiku ho objetivu atu hamenus poluisaun ambientál no proteje saúde públika.
Diretór Nasionál Kontrolu Poluisaun, Arlindo Silveira, informa husi 2019 to’o 2025, DNKP arrekada taxa liuhusi fonte rua mak importasaun plástiku no taxa óleu fo’er ne’ebé prodús husi empreza internasionál, inklui sentrál elétrika Hera no Betanu. Totál reseita ne’ebé rekolla hamutuk millaun $1, husi taxa plástiku kontribui $800.845 (husi 2022-2025) no taxa óleu fo’er $197.004 (husi 2019-2025).
Óleu fo’er ne’ebé rekolla transporta bá tanke lima ne’ebé Governu prepara iha Tíbar hodi halo tratamentu tuir padrasaun ambientál.
DNPK sei halo fiskalizasaun iha merkadu Taibesi, Manleuana no kioske sira iha kapitál hodi garante katak plástiku ne’ebé fa’an tuir tuir Dekretu-lei nú. 37/2020, bandu importasaun no produsaun plástiku uzu úniku.
Dekretu-lei ne’e promulga ona husi antigu Prezidente Repúblika, Francisco Guterres ‘Lú Olo’, hodi asegura implementasaun lei no hamenus impaktu negativu ba ambiente no saúde públika.
Arlindo Silveira mós dehan sira sei serbisu hamutuk ho autoridade lokál no entidade relevante sira atu fó informasaun ba vendedór sira kona-ba regra foun sira. Ba sira ne’ebé la kumpre lei, sei aplika medida administrativa tuir regulamentu ne’ebé vigor.
Tuir nia, ho implementasaun rigorozu husi Dekretu-Lei Númeru. 37/2020, volume lixu plástiku iha merkadu no fatin públiku sira bele hamenus signifikativu, no sosiedade mós bele uza alternativu hanesan sakola ka embalajen reziklavel.
Medida ne’e sai parte husi esforsu nasionál atu proteje ambiente no promove dezenvolvimentu sustentavel ba Timor-Leste iha futuru.
Jornalista: Arminda Fonseca
Editora: Maria Auxiliadora
