DILI, 26 Fevereiru 2026 (TATOLI) – Ministériu Koordenadór Asuntu Ekonómiku (MKAE) no TradeInvest Timor-Leste atribui, ohin, sertifikadu investimentu ba empreza Aowen Caizi Unipessoal Lda., Lijuramosxdaily Unipessoal Lda., no Galhos International Unipessoal Lda.
Sertifikadu investimentu ne’ebé Governu atribui ne’e hanesan parte rekoñesimentu ida husi Governu ba empreza sira katak halo duni sira-nia investimentu ba Timor-Leste.
“Kompañia tolu ne’e iha ona kompromisu, hahú ona sira-nia negósiu iha tinan barak nia laran, ne’ebé importa ona ba nasaun barak. Ida-ne’e mak ita presiza dudu nafatin setór privadu sira iha área oioin, nune’e bele investe no Governu mós bele tau-matan ba sira”, Ministru Koordenadór ba Asuntu Ekonómiku, Francisco Kalbuadi Lay, hateten iha Faról, ohin.
Tuir nia, bainhira timoroan sira esforsu an halo investimentu iha rai-laran no Governu nia papél dudu nafatin sira ba oin, tanba bainhira serbisu hamutuk bele kria postu traballu, nomós kria ekonomia ida ne’ebé sustentavel.
Diretór empreza Lijuramosxdaily, Ussi da Silva, dehan atividade ne’ebé durante ne’e sira halo mak hanesan produsaun budu-tasi sai produtu Sea Moss, halo produsaun ba masin-fatuk Laga, produsaun marungi no bani-been.
“Produtu sira ne’ebé ha’u prodús daudaun ne’e halo ona esportasaun bá nasaun ASEAN tomak, Austrália, inklui europa. Produtu sira ne’ebé ha’u prodús halo hotu iha rai-laran”, dehan.
Husi produsaun Sea Moss, empreza ne’e fó ona serbisu ba traballadór 200, ba atividade produsaun masin no marungi iha Baukau emprega ema na’in-40 no, tuir planu, iha Juñu sei aumenta funsionáriu ba 300 no ba produsaun bani-been kontrata ona to’os-na’in 300.
Iha sorin seluk, Diretór empreza Galhos International, Lúcio Galhos, hateten durante halo investimentu iha Likisá-Aipelu dezde 2023 foku ba produsaun manu-tolun, produsaun ai-han animál nian no planu atu halo tan produsaun ba manu lokál.
Na’in ba empreza Aowen Caizi, Kathleen Gonçalves, hateten sira-nia empreza foku ba materiál konstrusaun ninian hanesan lightweight block ne’ebé halo iha Kaitehu-Likisá
“Ami kontente tebes tanba hetan ona lisensa investimentu atu fasilita ami-nia investimentu ida-ne’e ba oin. Espera katak fulan neen nia laran bele lori ona bá merkadu hodi fasilita públiku ne’ebé presiza”, dehan.
Jornalista: Arminda Fonseca
Editora: Maria Auxiliadora
