DILI, 26 Fevereiru 2026 (TATOLI)—Prezidente Autoridade Munisípiu (PAM) Dili, Fransisco dos Santos, hateten durante inundasaun PAM distribui aihan prelimináriu ba família afetadu hamutuk 100-resin iha Bairru Pite.
“Ami-nia servisu rutina ne’ebé mai halo hodi garante sidade moos, la’ós inundasaun mak halo servisu. Maibé ami esforsu no masimiza rekursu umanu ne’ebé ami iha, entaun ami distribui ona sasán prelemináriu ba ita-nia vítima ba dezastre ba uma kain sira iha Bairru Pite hanesan atende direta ba vitima sira hanesan foos. mina no nesesidade bázika sira seluk,” Fransisco dos Santos hateten ba Agência TATOLI iha nia kna’ar fatin Matadoru, ohin.
Nia esplika, banhiira udan monu rai halo inundasaun mosu iha fatin-fatin maibé AMD simu dadus husi Bairru Pite ne’ebé uma kain hamutuk 100 resin identifikaddu, entaun AMD distribui sasán dapur nian ba vítima sira.
Iha sorin seluk, Xefe Suku Bairru Pite, Joaninha Alves Soares, hateten Diretór Protesaun Sivil servisu hamutuk ho Autoridade Munisípiu Dili halo ona levantamentu dadus bazeia informasaun husi xefe aldeia sira katak ba aldeia sira-ne’ebé mak afetada hamutuk aldeia neen (6).
“Komunidade afetadu inundasaun husi suku Bairru Pite hamutuk aldeia neen mak apoiu emerjénsia husi Autoridade protesaun Sivil ho PAM relasiona ho udan ne’ebé akontese iha loron 22 no 24 Fevereiru mak hanesan aldeia Timor Kmanek uma kain rua (2), Tane Timor uma kain ida (1), TAT uma kain haat (4), Andevil uma Kain 12, Rio de Janeiro uma kain rua (2) no Xamatana uma kain 76,” nia dehan.
Nia haktuir, komunidade afetadu sira-ne’e simu ona aihan emerjénsia iha loron horisehik mak hanesan foos, mina, lona, kulxaun, balde no nesesidade sira seluk tan.
Jornalista : Felicidade Ximenes
Editór : Cancio Ximenes
