VIKEKE, 26 Fevereiru 2026 (TATOLI)—Sekretáriu Estadu Kooperativa, Arsénio Pereira da Silva, husu kooperativa primária rua iha Postu Administrativu Uatulari, Munisípiu Vikeke, atu halo esforsu sustentabiliza ekonomia família.
“Ohin ha’u mai fó pose ba kooperativa primária rua iha Postu Uatulari hanesan Kooperativa Kréditu Rai Osan Hamutuk Redús Ki’ik no Kooperativa Produsaun Hakbiit Família (K-PHF). Tan ne’e, ha’u husu ba kooperativa rua ne’e halo esforsu sustentabiliza ekonomia família tanba sira iha kapitál rasik,” Arsénio Pereira hateten iha serimónia pose ba estrutura kooperativa rua, iha Postu Uatulari, Kinta ne’e.
Governante ne’e haktuir Timor-Leste iha kooperativa barak mak susesu ona tanba sira iha kapitál atinje millaun $1 to’o millaun $2 hodi fasilita membru sira.
Tan ne’e, nia solisita inan-aman sira-ne’ebé hela iha área rurál organiza malu hodi harii kooperativa hodi servisu hamutuk atu hadi’a ekonomia família, nune’e mós husu autoridade sira koordena ho funsionáriu SECoop iha Vikeke hodi fasilita grupu sira-ne’ebé eziste transforma ba kooperativa.
Iha fatin hanesan, Reprezentante Autoridade Munisípiu Vikeke, Luís António da S. Soares, haktuir membru kooperativa rua ne’ebé hetan ona formasaun husi Sekretaria Estadu Kooperativa (SEKoop) ne’e tenke hala’o atividade ne’ebé kooperativa sira planeia.
“Ha’u lori autoridade munisípiu hakarak husu membru kooperativa sira tenke iha responsabilidade ba kooperativa ho di’ak hodi hasa’e ekonomia família iha postu administrativu Uatulari,” nia hato’o.
Iha fatin hanesan, reprezentante membru CU-ROHEK, Flávio Joaquim, hato’o agradesimentu ba Sekretáriu Estadu Kooperativa ne’ebé mai fó pose ba estrutura kooperativa rua ne’ebé ezista iha Postu Uatulari.
“Iha oportunidade ida-ne’e ami hakarak rekomenda ba Sekretáriu Estadu nafatin tau-matan ba ami atu ami bele hakat bá-oin,” nia prefere.
Tuir dadus, Kooperativa Kréditu Rai Osan Hamutuk Redús Ki’ik ho totál membru hamutuk na’in-51 no Kooperativa Produsaun Hakbiit Família (K-PHF) membru ativu na’in-30.
Partisipa iha serimónia pose ne’e husi autoridade lokál, funasionáriu SEKoop nasionál no munisípiu, reprezentante Polísia Nasionál Timor-Leste (PNTL) Eskuadra Uatulari, veteranu, komunidade no membru husi kooperativa rua.
Jornalista: Vitorino Lopes da Costa
Editór: Xisto Freitas da Piedade
