DILI, 26 Fevereiru 2026 (TATOLI) — Papa Leão XIV tuir planu sei hala’o vizita apostólika internasionál ba nasaun España, Mónako no Áfrika. Iha Áfrika, Papa Leão XIV sei vizita mos nasaun membru Áfrika inklui Angola no Guiné Equatórial, ne’ebe nu’udar membru hosi Komunidade País sira Lian Portugés nian (CPLP – Comunidade dos Países de Língua Portuguesa).
Hanesan fó sai hosi Vatican News (25 Fevereiru), anúnsiu ne’e fó sai iha komunikadu ofisiál hosi Gabinete Imprensa Vatikanu nian iha semana ne’e.
Tuir planu, Papa Leão XIV sei hahú nia viajen ho vizita badak ida ba Prinsípiu Mónako nian iha loron 28 fulan Marsu, molok kontinua viajen loron sanulu nian ba nasaun Áfrika sira iha fulan Abril, liu-liu ba nasaun sira hanesan Aljazair, Kamerun, Angola, no Guiné Equatoriál, hosi loron 13 to’o 23 fulan Abril.
Durante estadia iha Angola, Papa tuir planu sei hasoru malu ho autoridade Igreja nian no komunidade katólika lokál sira iha sidade sira hanesan Luanda, Muxima, no Saurimo. Iha Guiné Equatoriál, nia sei vizita Malabo, Mongomo, no Bata.
Viajen ida-ne’e deskreve hanesan viajen ida ne’ebé kompleksu ne’ebé la’ós de’it komemora Saun Agostinho de Hippo, ne’ebé asosiadu ho Susesór Pedro nian, maibé mós fó atensaun espesiál ba sira ne’ebé vulnerável liu, inklui ema kiak sira no sira ne’ebé tau matan ba sira.
Foku seluk hosi vizita ne’e sei promove dame, partikularmente iha zona sira ne’ebé maka hasoru ona ka hasoru hela konflitu, hanesan norte Kamerun nian, ne’ebé maka hetan destruisaun hosi funu sivil ida ne’ebé maka hala’o durante tinan sanulu.
Iha Aljazair, Amu Papa sei tuir Saun Agostinho de Hippo nia ain-fatin hodi vizita Argel no Annaba. Ajenda vizita nian inklui enkontru sira ho komunidade kristaun minoria sira no diálogu interrelijiozu ho líder musulmanu sira, subliña fraternidade no toleránsia.
Iha Kamerun, Amu Papa sei vizita sidade sira Yaoundé, Bamenda, no Douala. Vizita ne’e sei destaka apoiu ba dame iha rejiaun luzófonu, ne’ebé durante tinan sanulu liubá hetan konflitu entre forsa regulár no separatista sira. Amu Papa mós sei hasoru malu ho komunidade katólika lokál sira, líder sira sosiedade sivíl nian, no instituisaun sosiál sira ne’ebé serbisu ho ema kiak sira no refujiadu sira.
Aleinde nia vizita ba Áfrika, Papa Leão XIV sei hala’o viajen apostóliku sira seluk iha tinan ida-ne’e, inklui vizita ida ba España hosi loron 06 to’o 12 fulan Juñu, liu-liu ba sidade sira iha Madrid, Barcelona, no Illa Kanáriu.
Iha Barcelona, Amu Papa sei inagura torre foun no aas liu hosi Bazílika Sagrada Família nian, hamutuk ho aniversáriu ba dala 100 hosi arkitetu Antoni Gaudí nia mate, ne’ebé deklara ona hanesan Venerável Servidór Maromak nian iha tinan ida liubá.
Tuir mai, iha illa Kanáriu sira, Amu Papa sei vizita Tenerife no Gran Kanaria, rejiaun sira ne’ebé sai hanesan dalan migrasaun importante sira hosi Áfrika ba Europa.
Viajen ida-ne’e sei subliña mós kompromisu Vatikanu nian ba katóliku sira iha mundu tomak, hosi komunidade minoria sira iha Aljazair no nasaun musulmanu sira to’o komunidade sira ho maioria kristaun iha Áfrika Sentrál no Súl, no mós enkontru sira ho ema sira iha nasaun europeu sira ne’ebé hasoru dezafiu sira sekularizasaun nian.
Vizita ba Mónako marka mós rekoñesimentu ida ba diálogu entre Igreja no autoridade sivíl sira iha nasaun europeu ki’ik ida-ne’e ho kompromisu maka’as ba dame.
TATOLI
