VIKEKE, 27 Fevereiru 2026 (TATOLI)—Reprezentante natar-na’in área Iratokór, Suku Babulu, Postu Administrativu Uatulari, Munisípiu Vikeke, Anacleto Ximenes Amaral, husu Governu liuhusi Ministériu Agrikultua, Peska, Pekuária no Floresta (MAPPF) atu hadi’a irrigasaun ba natar Iratokor kuaze ektare 100-resin ne’ebé agora sai abandonadu.
“Ami-nia irrigasaun Iratokor ne’e uluk iha, maibé kanál iha mota Bebui mota estraga tiha iha tinan 2007. Nune’e, iha tinan 2025, ami uza udan-been mak halai natar no komunidade kuda hotu hare, maibé to’o iha hare besik isin bee maran, entaun hare barak mak la konsege kolleta. Tan ne’e, ami husu Governu liuliu MAPPF tau-matan ba ami-nia irrigasaun atu ami bele halai natar hodi hasa’e produsaun hare,” Anacleto Ximenes Amaral ba jornalista sira iha Suku Afaloikai, Sesta ne’e.
Nia haktuir durante ne’e komunidade ne’ebé hela iha área Alembata, Suku Babulu la halo natar tanba irrigasaun aat, nune’e komunidade sosa fali foos hodi konsume loron-loron.
Hatán ba preokupasaun ne’e, Koordenadór Estensionista Postu Uatulari, Francisco Tilman Belo, rekoñese irrigasaun ba natar Iratokor ne’e aat tinan barak ona, tan ne’e natar sai abandonadu.
“Kona-ba irrigasaun Iratokor durante ne’e ha’u relata beibeik ba ami-nia ministériu maibé seidauk hadi’a. Nune’e, foin lalais ne’e, ha’u aprezenta ona iha Asembleia Postu Administrativu Uatulari (ASPA) sai planu prioridade, maibé to’o agora seidauk fó resposta ba agrikultór sira-nia preokupasaun,” nia subliña.
Tuir dadus, populasaun Suku Babulu iha aldeia hitu ho totál abitante hamutuk 2.718 no totál uma-kain 636.
Jornalista: Vitorino Lopes da Costa
Editór: Xisto Freitas da Piedade
