DILI, 27 Fevereiru 2026 (TATOLI)—Ekipa AD SLB lidera hikas tabela klasifikasaun hafoin susesu dudu sees S’amuser FC iha jornada da-14 primeira divizaun Liga Futeból Femininu Timor-Leste (LFFTL).
AD SLB ne’ebé to’o jornada da-12 okupa iha pozisaun daruak ho pontu 29 susesu aumenta pontu neen (6) iha jogu rua ikus bainhira manán Vale de Lahane (VDL) ho skor 0-10 iha jornada-13 no jornada da-14 dere Akadémika FC ho skor 7-0.
AD SLB rasik iha direitu lidera hikas tabela klasifikasaun maski kontajen pontu hanesan ho Buibere no S’amuser ho totál pontu 35 maibé ekipa husi Laulara ne’e liu produtividade golu (+/-) 97 bainhira kompara ho Buibere FC ne’ebé iha pozisaun daruak ho golu 90 no S’amuser FC 83.
Notísia relevante: Na’in-Feto FC dere UNITAL 7-1, AD SLB gaña pontu tolu husi Maranatha
Enkuantu, S’amuser FC ne’ebé lidera tabela klasifikasaun to’o jornada-12 ho pontu 34 obrigadu tenke tun ba pozisaun datoluk hafoin jogu rua ikus falla rekolla pontu hafoin impata ho ekipa Na’in-Feto 1-1 iha jornada-12 no derrota kontra Buibere FC 1-0.
Aleinde ne’e, Buibere FC ne’ebé iha pozisaun datoluk hakat eskada ida ba pozisaun daruak tabela klasifikasaun hafoin susesu manán Kulugisa ho skor 0-19 no S’amuser FC 1-0.
Entretantu, ekipa Maudoko FC iha pozisaun dahaat ho totál pontu 32, Maranatha okupa pozisaun dalimak ho pontu 21, Akadémika rekolla pontu 15 hodi okupa iha pozisaun daneen, UNITAL FC iha pozisaun dahitu ho pontu 12.
Enkuntu, ekipa Na’in-Feto sees husi zona mean hodi mantein iha pozisaun daualuk ho pontu 12, ekipa rua seluk hanesan VDL iha pozisaun dasiak ho pontu hitu (7) no Kulugisa FC nafatin laiha pontu hodi mantein iha pozisaun dasanuluk primeira divizaun LFFTL.
Jornalista: Natalino Belo
Editór: Xisto Freitas da Piedade
