DILI, 27 Fevereiru 2026 (TATOLI)—Ekipa Feminina Kulugisa Football Club (FC) serteja tun ona bá segunda divizaun mezmu gaña pontu iha jogu haat ikus iha primeira divizaun Liga Futeból Femeninu Timor-Leste (LFFTL).
Ekipa husi Munisípiu Baukau durante jornada 14 kontinua derrota no seidauk iha pontu hodi nafatin mantein iha pozisaun sanuluk iha tabela klasifikasaun primeira divizaun LFFTL.
Notísia relevante: Kulugisa FC kontinua sofre golu iha primeira divizaun LFFTL
Haree ba rezultadu, bainhira halo kalkulasaun maski Kulugisa FC gaña pontu 12 husi jogu haat ikus maibé totál pontu referidu seidauk salva husi zona risku tanba menus golu (+/-) 173 bainhira kompara ho Na’in-Feto FC ne’ebé okupa iha pozisaun daualu ho pontu 12 no hela jogu haat (4).
Tuir oráriu, hela jogu haat ne’ebé Kulugisa hasoru hanesan sei kontra AD SLB iha jornada da-15, UNITAL FC jornada-16, Na’in-Feto FC jornada-17, jornada-18 sei kontra Buibere no ikus jornada-19 sei kontra Maranatha FC.
Husi ekipa haat ne’ebé mensiona, iha jogu volta dahuluk Kulugisa sofre derrota nune’e posibilidade ekipa ne’e lakon pontu hodi tun ba segunda divizaun LFFTL.
Entretantu, kompetisaun primeira divizaun LFFTL tuir oráriu sei termina iha 23 Marsu iha-ne’ebé ekipa AD SLB sei kontra S’amuser FC ne’ebé sei hala’o iha Kampu FFTL, Bairros dos Grilos.
Jornalista: Natalino Belo
Editór: Xisto Freitas da Piedade
