DILI, 27 Fevereiru 2026 (TATOLI) – Core Group Transparency Timor-Leste (CGT-TL) realiza formasaun kona-ba asuntu mundasa klimátika ba líder komunitáriu sira husi munisípiu Dili, Ermera, Likisá no Aileu.
“Objetivu husi treinametu ida-ne’e atu introdús kona-ba mudansa klimatika. Ita hotu hatene mudansa klimátika mosu mai husi karáter ema nian, nune’e ami halo diskusaun ho líder komunitariau sira bele buka dalan ba problema sira ne’ebé komunidade hasoru, liuliu feto no labarik feto sira sai vulneravel ba mudansa klimátika”, Koordenadór Nasionál CGT-TL, Jemicarte Moniz, hateten.
Tuir nia, problema mudansa klimatika ne’ebé akontese iha Timor-Leste mak komunidade tesi ai no sunu rai arbiru, ne’ebé kontribui makaas ba mudansa klimátika.
Treinamentu ne’e konvida líder komunitariu no pontu fokál sira hodi hato’o sira-nia hanoin kona-ba mudansa klimátika ne’ebé akontese iha sira-nia área rasik no buka ninia solusaun.
Iha tinan kotuk, CGT-TL no Oxfam lansa ona plataforma klimátika ho naran “Comité Reziliénsia Hasoru Alterasaun Klimátika” ka CRHAK hodi haree ba asuntu mudansa klimátika ne’ebé akontese iha suku sira.
Objetivu prinsipál husi lansamentu ne’e atu loke espasu ida entre parseiru sosiedade sivíl, liuliu CGT-TL no nia membru sira atu iha filleira ida ne’ebé konsolida grupu hanesan autoridade lokál, komunidade, juventude, inklui feto bele serbisu hamutuk hodi hasoru mudansa klimátika ne’ebé akontese.
Nune’e, liuhusi treinamentu ne’e oinsá autoridade lokál, pontu fokál, delegadu, inklui komunidade, hatene no partisipa iha atividade ba adaptasaun no mitigasaun hasoru alterasaun klimátika no prevensaun ba dezastre naturál neʼebé kauza husi mudansa klimátika.
Xefe Suku Lauhana, husi postu adminitrativa Letefoho, munisípiu Ermera, Tomé de Deus, hateten formasaun ne’e importante tanba halo diskusaun kona-ba mudansa klimátika liga ba problema saida mak komunidade hasoru no autoridade lokál sira halo protesaun no mitigasaun.
Nia promete katak informasaun sira ne’ebé hetan iha formasaun sei fahe komunidade tanba atu prevene mudansa klimátika ne’e sira presiza tebes hatene, nune’e bele kuidadu ambiente.
Jornalista: Arminda Fonseca
Editora: Maria Auxiliadora
