MANATUTU, 27 Fevereiru 2026 (TATOLI)—Primeiru-Ministru (PM), Kay Rala Xanana Gusmão, sesta ne’e, lansa fatuk dahuluk ba konstrusaun edifísiu Asembleia Munisipál Manatutu iha Postu Administrativu Manatutu-Vila, Munisípiu Manatutu.
Lansamentu ne’e halo hafoin, Xefe Governu halo avaliasaun ba kondisaun mínima Manatutu nian ba preparasain polítika desntralizasaun no podér lokál.
Ministru Administrasaun Estatál (MAE), Tomas do Rosario Cabral, hateten lansamentu ne’e hanesan faze primeiru no sei alarga ba munisípiu sira iha territóriu.
“Ida-ne’e hanesan faze primeiru, ita sei alarga ba munisípiu sira hotu. Ita agradese ba Ministériu Planeamentu Investimentu Estratéjiku (MPIE),” Tomas hateten hafoin halo lansamentu ba obra ne’e.
Obra ne’e, nia dehan, sei konstrui husi empreza Aitula Holding ne’ebé timoroan ida mak kaer ho orsamentu hamutuk millaun $2,5.
“Obra ne’e Aitula mak kaer, maibé dezeñu sira hotu ADN mak prepara. Tempu besik ami ba foti hodi hala’o konstrusaun. Agora ita lansa tiha, ba oin, konstrusaun la’o ona. Ita-nia alvu projetu ne’e finaliza tinan ida resin tanba uma ne’e boot,” Diretór empreza Aitula, Silveiro Fereira Mau-Bere hateten.
Biban ne’e, Xefe Governu mós asina plaka ba konstrusaun eskola Ensinu Bázika Sentrál (EBC) no dapur ba merenda eskolár. Eskola ne’e lokaliza iha suku Hatularan, Postu Administrativu Laleia, Munisípiu Manatutu.
Memebru Governu ne’ebé akompaña Primeiru-Ministru iha serimónia ne’e mak Ministru Administrasaun Estatál (MAE), Tomás do Rosário Cabral, Ministru Planeamentu no Investimentu Estratéjiku (MPIE), Gastão Francisco de Sousa, Ministra Saúde (MS), Elia dos Reis Amaral, Ministru Agrikultura, Pekuária, Peska no Floreta (MAPPF), Marcos da Cruz, Sekretáriu Estadu Arte no Kultura (SEAK), Jorge Soares Cristovão, Sekretáriu Estadu Dezenvolvimentu Lokál, Mateus dos Santos Tallo, Prezidente Autoridade Munisípiu Manatutu, Luis Fernandes no Administradór Postu Administrativu sira.
Jornalista : Hortencio Sanchez
Editór : Cancio Ximenes
