MANATUTU, 27 Fevereiru 2026 (TATOLI)—Primeiru-Ministru (PM), Kay Rala Xanana Gusmão, sesta ne’e, hala’o vizita no haree direta fatin produsaun oxijéniu iha Postu Administrativu Manatuto-Vila, Munisípiu Manatutu, ne’ebé prodús husi Empreza Ultra Controlo Projectos Industriais, Lda, husi Portugál.
Primeiru-Ministru apresia tebes tanba oxijéniu ne’e sei ajuda tebes servisu profisionál saúde sira hodi fó atendimentu di’ak liután ba pasiente sira-ne’ebé presiza. Konstrusaun fatin produsaun oxijéniu ne’e ho númeru kontratu PR#25780-TLS-H-MOH-PO5 ho orsamentu $477,902.20, hahú hosi fulan-Fevereiru to’o Jullu 2025.
Ministra Saúde, Elía Amaral, hateten Timor-Leste presiza harii sentru oxijeniu ida-ne’ebé ho nia padraun Europa.
“Produsaun oxijeniu ne’e importante tebes, nia padraunr Europa nian. Ida-ne’e mak ita-nia Primeiru-Ministru mai haree direita. Oxijeniu ne’e iha kategoria rua, selindru kiik ho litru 40 no selin
dru boot litru 60,” Elía dehan.
Planu ne’e, nia dehan, hahú kedan husi eis-administradóra Madalena Hanjam ne’ebé utiliza orsamentu husi Administradora Fundu Globál.
“Kada loron produsaun ba oxijéniu ne’e kiik nia kuantidade bele to’o 80 resin, maibé ida boot ne’e kada loron tékniku sira prodús kuantidade to’o 40 resin, sira servisu iha ne’e mesak timoroan, Manatutu oan, sira hetan formasaun husi Fundu Globál, empreza rasik no Ministériu Saúde,” Elía katak.
Oxijeniu ne’e hahú prodús iha tinan kotuk no dadaun ne’e hatama ona ba ospitál iha Munisípiu Manatutu, iha tempu besik bele distribui ba Baucau no Vikeke.
Vizita ne’e hafoin “Haree besik servisu munisipál Manatuto hosi rezultadu avaliasaun kondisaun minima” molok avansa bá eleisaun Governu lokál ne’ebé sei akontese iha 2027.
Jornalista : Hortencio Sanchez
Editór : Cancio Ximenes
