DILI, 27 Fevereiru 2026 (TATOLI)—Servisu Nasionál Ambulánsia Emerjénsia no Medikamentu, Institutu Públiku (sigla, SNAEM, I.P), sesta ne’e, fó treinamentu báziku kona-ba primeiru sokoru ba funsionáriu Mission Aviation Fellowship (MAF).
“Ita-nia atividade ida-ne’e husi SNAEM mak fornese treinamentu primeiru sokoru tanba treinamentu ne’e importante tebes. Treinamentu ne’e ita fó sira loron ida de’it ba funsionáriu sira-ne’ebé servisu iha aviaun MAF nian,” Diretór Servisu Nasionál Ambulánsia Emerjénsia no Medikamentu, Institu Públiku (sigla, SNAEM, I.P), Simplicio Amaral, dehan ba jornalista sira, iha edifisiu MAF Aeroportu Internasionál Nicolau Lobato, Komoro.
Nia esplika, aviaun MAF ne’e Governu Timor-Leste uza hodi transporta pasiente sira husi munisípiu mai Dili hodi ba halo tratamentu saúde iha Hospitál Nasionál Guido Valadares.
“Servisu kooperasaun entre Ministériu Saúde ho MAF rasik hahú iha tinan 2017 to’o mai agora. Sira-nia lema ne’e mai ho misaun umanitária hodi fo apoiu komunidade Timor-Leste hodi halo intervensaun rápida ba pasiente sira-ne’ebé mais kritiku iha munisípiu mai HNGV. Moras sira-ne’ebe mak labele halo intervensaun iha munisípiu liuliu iha hospitál referál no rejionál, entaun sira tenke ba foti husi munisípiu mai Dili, ne’ebé labele ho transporte Terrestre. Kazu ne’ebé barak liu sira transporta mak hanesan kazu trauma, kardiál, maternidade no seluk tan,” nia dehan.
Husi Janeiru mai to’o agora ne’e, aviaun MAF evakua ona pasiente hamutuk 37 ne’e mai iha nasionál, husi numeru ne’e fulan-Janeiru pasiente hamutuk na’in-19 no fulan-Fevereiru ne’e pasiente hamutuk na’in-18.
Iha fatin hanesan, Diretór Ezekutivu MAF, Lungpinglak Domtta, hateten MAF halo parseria ho Ministé riu Saúde hahú iha tinan 2017 no buras to’o ohin loron. Entaun, fomasaun ne’ebé mak agora daudaun SNAEM fó ne’e ba primeiru sokoru oinsá utilizasaun ekipamentu no buat sira seluk ne’ebé la’o iha aviaun nian.
“Ha’u kontente tebes atu haree katak ita-boot sira hatene ita bele troka hanoin ba malu liuhusi treinamentu ida-ne’e. Iha pasada, barak liu ita mak fó treinamentu maibé ohin loron ita simu hela treinamentu primeiru sokoru husi ekipa ambulánsia. Nune’e, ha’u bele fó sasin katak ita-nia parseria buras iha tinan hirak nia laran no sei kontinua buras, no hanesan ita servisu hanesan ita kontinua serbí povu Timor-Leste. Ami fiar katak ami-nia parseria sei hametin no ida-ne’e sei ajuda ema sira iha komunidade,” nia hateten.
Jornalista : Felicidade Ximenes
Editór : Cancio Ximenes
