DILI, 28 Fevereiru 2026 (TATOLI)—Membru Komisaun G ne’ebé trata Asuntu Edukasaun, Juventude, Desportu no Kultura iha Parlamentu Nasionál (PN) halo fiskalizasaun iha eskola balun iha territóriu nasionál, ne’ebé identifika problema balun kontinua enfrenta, nune’e presiza iha jestaun di’ak.
“Ita haree edukasaun iha territóriu problema hotu. Sira iha problema mak falta profesór, saladeaula menus, iha eskola balun manorin barak maibé karga oráriu la to’o oras 24, no iha balun estudante 100-resin ho manorin na’in-rua. Aleinde ne’e, karteira eskolár iha eskola balun laiha maibé iha sorin seluk karteira eskolár tula malu iha klase laran. Ida-ne’e ita nota laiha jestaun husi dirijente eskola nomós dirijente edukasaun munisipál sira, presiza tau atensaun,” Prezidente Komisaun G, Armando dos Santos Lopes, hato’o ba Jornalista sira hafoin partisipa iha tomada pose ba manorin rekrutadu Bolsa Kandidatu Ensinu Báziku, iha Zinájiu, Kolmera, Sábadu ne’e.
Notísia relevante : Deputadu KHUNTO husu ME tau atensaun urjente ba falta profesór iha eskola balun
Nia fó ezemplu, Ensinu Báziku Sentrál ida iha Suku Leohitu, Postu Administrativu Balibo, Munisípiu Bobonaru, iha manorin na’in-rua ne’ebé hanorin estudante 100. “Nia (manorin) la hanorin to’o 24 pur semana. Tanba ne’e, presiza iha jestaun ne’ebé di’ak no oinsá koloka profesór iha eskola sira.”
Aleinde ne’e, manorin jeolojia ida mak hanorin fali matéria importante sira hanesan lian portugés, matemátika, istória no jeografia iha Ensinu Sekundáriu Tékniku Vokasionál ida iha Atabae.
“Entaun oinsá ita atu normaliza situasaun ne’e mak presiza jestaun hosi Diretór Edukasaun Munisipál, ne’ebé halo identifikasaun no kolokasaun manorin. Ida-ne’e importante,” nia katak.
Reprezentante povu iha PN ne’e subliña, bainhira sira halo ona fiskalizasaun no rekomendasaun, sira haruka ba Ministériu Edukasaun atu halo avaliasaun ba ida-ne’e no desizaun ne’e iha ezekutivu nia liman.
Jornalista : Osória Marques
Editora : Julia Chatarina
