DILI, 02 Marsu 2026 (TATOLI)–Embaixadór Naun-Rezidente foun Estraordináriu no Plenipotensiáriu Azerbaijaun nian ho sede iha Jakarta, Indonézia, Ramil Rzayev, aprezenta karta kredensiál ba Prezidente Repúblika, José Ramos-Horta, segunda ne’e iha Palásiu Prezidensiál, Nicolau Lobatu Dili.
Hafoin aprezentasaun kredensiál, hala’o kedan enkontru bilaterál ida-ne’ebé durante ne’e ko’alia kona-ba perspetiva sira ba koperasaun iha futuru entre nasaun rua ne’e, inklui posibilidade husi Xefe Estadu nia partisipasaun iha simeira ida-ne’ebé marka ona ba fulan-Maiu iha Azerbaijaun.
Diretór Nasionál Asuntu Bilaterál sira ba Amérika, Europa no Áfrika hosi Ministériu Negósiu no Koperasaun (MNEK), António Soares, hateten enkontru ne’e permite halo avaliasaun ba koperasaun ne’ebé iha no esplorasaun ba área kolaborasaun foun sira.
“Ami diskute kona-ba posibilidade kooperasaun iha setór enerjia, petróleu no gás, edukasaun, no agrikultura. Iha edukasaun, ami analiza posibilidade atu fó bolsa estudu ba ema timoroan sira. Iha setór petróleu no gás, Azerbaijaun iha ona esperiénsia, ne’ebé bele sai relevante ba parseria sira iha futuru no transferénsia koñesementu,” nia hateten ba jornalista sira.
António Soares mós informa katak iha enkontru ne’e, Prezidente Repúblika fahe esperiénsia Timor-Leste nian kona-ba promove pás no seguransa, nune’e mós relasaun di’ak ho Indonézia.
Jornalista : Hortencio Sanchez
Editór : Cancio Ximenes
