DILI, 02 Marsu 2026 (TATOLI)–Embaxadór foun husi Repúblika Korea Súl mai Timor-Leste Chang Hayeon, segunda ne’e, entrega karta kredensiál ba Prezidente Repúblika José Ramos-Horta antes hala’o misaun diplomsia iha Timor-Leste.
“Timor-Leste valoriza tebes ninia amizade ho Repúblika Korea, parseria ida-ne’ebé konsistentemente kontribui ona ba ita-nia dezenvolvimentu nasionál. Ha’u fiar katak iha Embaixadór Chang Hayeon nia lideransa, ita sei buka dalan foun ba parseria, partikularmente iha área seguransa no seguransa públika, hodi aproveita ninia esperiénsia ne’ebé distintu,” Ramos-Horta hateten iha nia diskursu iha serimónia entre karta kerdensiál iha Palásiu Prezidensiá, Nicolau Lobato, Bairru Pite.
Prezidente Ramos-Horta subliña, importánsia husi amizade ne’ebé naruk no nota katak Embaixadór nia kontribuisaun únika husi nia esperiénsia seguransa no diplomátika hanesan rikusoin id- ne’ebé iha valór ba kolaborasaun iha futuru.
Tanba ne’e, Prezidente espresa konfiansa katak Embaixadór Chang Hayeon nia nomeasaun sei eleva no hametin kooperasaun no amizade ne’ebé eziste entre Timor-Leste no Repúblika Korea, harii iha fundasaun respeitu mútuu no vizaun komun ba pás no prosperidade iha rejiaun ne’e.
Ministru Negósiu Estranjeiru no Kooperasaun (MNEK), Bendito dos Santos Freitas, reforsa tan katak bainhira Embaixadór husi nasaun ida atu mai hala’o misaun iha Timor-Leste tenke hatama uluk karta kredensiál.
“Embaixadór foun husi Korea nian, nia mai hato’o nia karta kredensiál ba Prezidente Repúblika, ida-ne’e prosesu normál ida, kumprimentu ba misaun diplomátika iha nasaun hotu-hotu. Ita-nian ba sira mós hanlo hanesan ne’e, no sira-nian mai ita mós halo hanesan ne’e,” Ministru Bendito hateten.
Nia dehan, Korea Súl ho Timor-Leste iha kooperasaun ne’ebé di’ak tebes iha área oioin hanesan ekonomia, dezenvolvimentu infrastrutura no prinsipál liu mak mobilidade laborál tanba timoroan hamutuk 7.000-resin mak hala’o hela servisu iha nasaun Korea Súl.
“Ita-nia Prezidente ko’alia katak, kooperasaun ho Korea Súl ne’e importante tebes no relasaun ida-ne’ebé di’ak tebes. Prezensa Embaxadór foun ne’e mai kontinua de’it mandatu ne’ebé antes ne’e iha ona hodi hametin liutan ita-nia kooperasaun,” Bendito tenik.
Embaixadór Chang Hayeon lori distintu kareira durante dékada tolu iha servisu públiku ba nia kna’ar foun iha Dili. Graduadu husi Universidade Polísia Nasionál Koreanu, nia mós iha Mestradu iha Administrasaun Públika hosi Universidade Yonsei. Nia kareira ne’ebé extensivu inklui lideransa nivel aas iha seguransa públika nu’udar Komisáriu ba Ajénsia Polísia Metropolitana Seoul no Adjuntu Komisáriu ba Ajénsia Polísia Nasionál Koreanu. Nia mós serbisu ona iha papél diplomátiku xave sira, inklui nu’udar Asistente Sekretáriu iha Gabinete Prezidente nian no tuirmai nu’udar Embaixadór ba Repúblika Guatemala.
Resipiente ida husi Orden Méritu Servisu nian (Red Stripes) no Sitasaun Prezidensiál oioin, Embaixadór Chang kombina esperiénsia kle’an iha seguransa no governasaun ho perísia diplomátika nivel aas.
Dezde estabelesimentu relasaun diplomátika iha tinan 2002, Timor-Leste no Repúblika Korea dezenvolve ona parseria ida-ne’ebé forte no amigável. Repúblika Koreia sai nu’udar parseiru ne’ebé vital iha Timor-Leste nia dezenvolvimentu, fó apoiu signifikativu iha edukasaun, kapasitasaun no dezenvolvimentu rekursu umanu.
Kooperasaun ne’e kontinua liuhusi kontribuisaun ba misaun manutensaun pás ONU nian, interkâmbiu diplomátiku no programa xave sira hanesan projetu dezenvolvimentu KOICA, Bolsa Estudu Globál Korea (GKS), no Sistema Lisensa Empregu (EPS), ne’ebé fornese oportunidade empregu ne’ebé iha valór ba traballadór timoroan sira iha Korea.
Jornalista : Hortencio Sanchez
Editór : Cancio Ximenes
