DILI, 02 Marsu 2026 (TATOLI)—Komisaun Rekrutamentu no Selesaun ba Kargu Juíz (KRSKJ) atualiza programa ba prosesu rekrutamentu juri ba kargu juíz Supremu Tribunál Justisa no Tribunál Rekursu ba Primeiru-Ministru, Kay Rala Xanana Gusmão.
Prezidente Komisaun Rekrutamentu, Avelino Coelho, hateten objetivu hasoru malu ho Primeiru-Ministru, Kay Rala Xanana Gusmão, hodi atualiza atividade ne’ebé dezde sira asume kna’ar nu’udar Komisáriu ba Komisaun Rekrutamentu ba kargu juíz supremu Tribunál Justisa no Ttibunál Rekursu.
“Ne’ebé tuir lejizlasaun ne’e rasik ami presiza aprova dokumentu balun antes tama ba faze rekrutamentu juri. Tanba ne’e, mak ohin ami mai hasoru Xefe Governu hodi halo tan espozisaun hanesan aprovasaun regulamentu avaliasaun, rejimentu internu, manuál operasionál juri inklui ami-nia atividade ne’ebé ami halo hela,” Prezidente komisaun ne’e informa ba jornalista sira iha Palásiu Governu, ohin.
Dirijente ne’e affirm, iha enkontru ne’e atu aproveita mós rona Primeiru-Ministru nia ideia ruma no sujestaun ba prosesu ida-ne’e, tanba tuir planu fulan ida ba aprovasaun ba demanda husi dokumentu lejislasaun nian no iha fulan-Abríl mak sira sei loke prosesu rekrutamentu juri entre ema na’in-tolu (3) se lae lima (5), ne’ebé presiza juri ne’e tenke konsileiru tanba Timor seidauk iha, ho nune’e mak envolve mós juri husi nasaun estranjeiru.
“Tanba kritéria ne’e ami prefere lian portugés no labele mosu deskonfia iha prosesu rekrutamentu, tanba ne’e mak ita bolu ekipa justi husi rai-li’ur, hafoin prontu ona maka foin loke konkursu ba supremu tribunál justisa,” nia esplika.
Iha supremu tribunál justisa sei loka konkursu hitu (7) kompostu husi kandidatu na’in-neen (6) husi konkursu no na’in-ida (1) Parlamentu Nasionál mak sei hili. Enkuantu ba kandidatu tribunál rekursu tarjetu iha na’in-sia (9).
Kritéria kandidatu juíz STJ no TR
Nia informa, bainhira atu tuir konkursu ba supremu tribunál justisa, juízes hotu-hotu tenke iha ona esperiénsia profesionál tinan 10 ka 15 hakna’ar-an hanesan juíz, nune’e mós ba Advogadu, jurista, profesór Fakuldade Direitu, Defensór no Prokuradór Repúblika mós bele tuir konkursu ba supremu tribunál justisa.
“Maibé iha fali tribunál rekursu kandidatu sira tenke juíz sira de’it ho esperiénsia profisionál mínimu tinan-ualu (8),” nia dehan.
Notísia Relevante: Tribunál Rekursu konklui promosaun ba juíz iha Abríl
Jornalista : Alexandra da Costa
Editór : Cancio Ximenes
