DILI, 02 Marsu 2026 (TATOLI)—Prezidente Autoridade Munisípiu (PAM) Dili, Francisco dos Santos klarifika lixeiru iha Tibar Munisípiu Likisá nian ne’e la’ós soe maibé rai iha-ne’ebá hodi distribui ba pontu kolesaun ne’ebé ekipa daudaun ne’e sei halo identifikasaun.
“Lixeiru ne’ebé iha Tibar ne’e la’ós ita soe maibé ita mak tau iha Tibar. Lixeiru hamutuk 1.122 no ita fahe ona lixeiru iha pontu kolesaun iha Dili laran hamutuk 793. Ida-ne’e ita distribui ona no restu mak ne’ebá hela, hodi antesipa ba komunidade ne’ebé sunu lixeiru no mós prepara ba alargamentu ne’ebé la’o hela,” nia dehan ba TATOLI iha nia kna’ar fatin, Matadouru, Dili, Segunda ne’e.
Tanba ne’e, nia hakarak hato’o liuhusi mídia nasionál katak lixeiru ne’e sei di’ak no asegura iha ne’ebá hodi hein fatin foun no parte balun ne’ebé ema sunu hodi tau.
“Ita identifika komunidade ka ema deskoñesidu sunu lixeiru iha parte Kampung Baru, iha Manleuna no mós iha Tribunal Rekursu nian sorin, Bekora, no iha fatin balunn baku rahun no iha fatin seluk tan,” Francisco tenik.
Lixeiru sira-ne’e sosa iha mandatu Governu Daualu nian. Osan ne’ebé lori sosa hamutuk millaun $1.7.
Jornalista: Osória Marques
Editór: Xisto Freitas da Piedade
