BAUKAU, 02 Marsu 2026 (TATOLI)—Prezidente Autoridade Munisipál (PAM) Baukau, Veneranda Eurico Lemos Martins husu ba Kombatente Libertasaun Nasionál hotu atu kontinua kontribui ba dezenvolvimentu iha Munisípiu Baukau.
Veneranda Lemos konsidera kombatente mak nu’udár riin ba ukun an no matadalan ba dezenvolvimentu, nune’e nu’udár Governu lokál husu ba veteranu atu kontinua apoiu dezenvolvimentu iha Munisípiu Baukau.
“Husu ba veteranu no veterana sira atu apoia ba Governu lokál, ajuda ami atu dezenvolvimentu ne’e labele iha perturbasaun,” Veneranda Lemos hateten bainhira partisipa iha misa agradesimentu hodi selebra Loron Nasionál Veteranu iha Igreja Katedrál Vila Antiga, Baukau, Segunda ne’e.
Eis deputada ne’e argumenta bainhira laiha apoia husi veteranu sira sei implika no sei la atinje tuir durasaun tempu ba projetu sira hanesan iha fulan-Fevereiru Governu sentrál lansa ona projetu reabilitasaun estrada urbana Baukau no lansamentu ba modernizasaun merkadu Munisipál Tuanau.
Aleinde ne’e, iha tempu besik Governu hamutuk ho Banku Mundiál sei lansa tan projetu água potavel no fulan-ne’e sei asina akordu entre Governu ho empreza nasionál hodi hahú peskiza rikeza naturál hanesan mina no minerál ha territóriu Baukau.
Jornalista: Natalino Belo
Editór: Xisto Freitas da Piedade
