BAUKAU, 02 Marsu 2026 (TATOLI)—Prezidente Konsellu Munisipál Kombatente Libertasaun Nasionál (CMCLN-sigla portugeza) Munisípiu Baukau, Cornélio Gama ‘L7’ baixa iha Ospitál Rejionál Baukau tanba moras.
L7 hahú baixa iha sala emerjénsia Ospitál Rejionál Eduardo Ximenes (HoREX, sigla portugeza) iha loron 26 Fevereiru tanba hetan moras iha parte kotuk laran no rezultadu ezameninasaun rezulta eis Komandante Rejiaun III sofre moras pulmaun kanek.
“Momentu mai halo konsulta ne’e sente moras la’o labele. Bainhira ami hasai raiu-x no hasai raan deteta moras iha pulmaun, ne’e mak doutór espesialista deside baixa para fó tratamentu antibiótiku,” Diretór Klinika HoREX Baukau, Mouzinho Francisco da Costa Belo hateten iha HoREX Baukau, Vila Nova, Baukau, Segunda ne’e.
Mouzinho Belo relata, aleinde ne’e, fatór idade iha-ne’ebé pozisaun nu’udár Prezidente CMCLN Baukau hala’o atividade viajen rutina entaun menus deskansa.
Nia haktuir, L7 rejeita atu kontinua hala’o tratamentu iha Hospital Nacional Guido Valadares (HNGV) mezmu parte jestór HoREX Baukau deside fó-sai karta transferénsia bá nasionál.
“Tuir informasaun husi espesialista ohin bele alta mais sei haree ba rejultadu, di’ak liu pasiente sei iha-ne’e deskansa para rekupera di’ak tiha lai mak ita fó alta,” Mozinho akresenta.
Iha fatin hanesan, Cornélio Gama “L7” hato’o agradese ba médiku no espesialista sira iha HoREX tanba durante baixa fó atendimentu di’ak no daudaun ne’e kondisaun saúde hahú di’ak.
“Ha’u sente di’ak ona. Doutór sira halo atendimentu di’ak,” L7 haktuir.
L7 argumenta maski idade avansada maibé nu’udár kombatente nafatin mehi no iha espíritu kontribui ba prosesu dezenvolvimentu nasaun.
L7 husu ba maluk veteranu sira iha territóriu nasionál atu konsolida opiniaun komún hodi haree problema dezenvolvimentu iha rai-laran nune’e Timor-Leste bele sai nasaun dezenvolvidu hanesan nasaun sira seluk.
Jornalista: Natalino Belo
Editór: Xisto Freitas da Piedade
