DILI, 02 Marsu 2026 (TATOLI)—Country Representative interinu foun husi Asia Foundation, Heidi Arbuckle, segunda ne’e, hasoru malu no enkontru ho Prezidente Repúblika, José Ramos-Horta hodi diskute kona-ba Asia Foundation nia komprimisiu kona-ba promosaun turizmu no halakon violénsia kontra feto.
“Enkontru ne’e, ko’alia kona-ba kooperasaun ne’ebé la’o hela iha setór vitál sira inklui promosaun turizmu, halakon violénsia kontra feto no dezenvolvimentu setór seguransa iha parseira ho Polísia Nasionál Timor-Leste,” Heidi Arbuckle hateten ba jornalista sira hafoin termina enkontru ho Xefe Estadu. iha Palásiu Prezidensiál Nicolau Lobato, Bairru Pite.
Nia dehan, Prezidente Ramos-Horta utiliza enkontru ne’e hodi enfatiza nia administrasun ne’ebé foku ba dezenvolvimentu iha baze.
Tanba ne’e, Xefe Estadu husu ba parseiru internasionál sira atu foku sira-nia esforsu ba nivel komunidade liuliu atu hasa’e produtividade família lokál no negósiu ki’ik sira.
Prezidente Ramos-Horta nota katak, hodi hasa’e padraun ospitalidade no atendementu home stay, Timor-Leste bele simu vizitante internasionál ho efektivu liu, hodi garante katak benefísiu husi indústria turizmu ne’ebé buras ne’e to’o iha komunidade rurál sira-nia leet.
Ho nune’e, Heidi Arbuckle hato’o agradesimentu ba Prezidente nia vizaun no reafirma fali Asia Foundation nia dedikasaun atu apoia prioridade nasionál Timor-Leste nian.
Nia mós foku ba papél Asia Foundation nian hodi fó kbiit ba organizasaun lokál sira atu halo peskiza independente no nia kompromisu atu haburas dezenvolvimentu sustentável.
Enkontru ne’e marka mós kontinuidade parseira entre Prezidénsia ho Asia Foundatio atu dudu progresu sosiál no reziliénsia ekonómika iha rejiaun hotu-hotu iha Timor-Leste.
Jornalista : Hortencio Sanchez
Editór : Cancio Ximenes
