KOVALIMA, 03 Marsu 2026 (TATOLI)- Konsellu Munisipál Kombatente Libertasaun Kovalima (CMCLN) hamutuk ho Autoridade Kovalima komemora loron nasionál veteranu ba dala-9 ho tema “Unidade iha Diversidade ho sentidu Patriotizmu.
“Ita kontinua hamutuk iha ne’e halo reflesaun istória pasadu kona-bá luta libertasaun nasionál hodi kontribui ba dezenvolvimentu nasionál. Tanba veteranu sira ita labele hein deit Estadu ka Governu mak fó ita, maibé ita mak tenke kontribui. Nune’e iha tempu ida ha’u sei ko’alia ho Sekretáriu Zona sira”, Prezidente Konsellu Kombatente Libertasaun Nasionál, Munisípiu Kovalima, Francisco Doutel Sarmento “Lamesak” hato’o liuhusi nia diskursu iha edifísiu Veteranu Kovalima Tabakolot.
Lamesak mós husu ba veteranu sira atu hamutuk no hadomi malu hodi konta istória passadu, no hanoin prezente nune’e bele rezolve problema nasaun.
“Iha loron nasionál veteranu Konsellu veteranu halibur veteranu hodi fó hanoin veteranu sira liuhusi loron nasionál veteranu ne’ebé tempu atu halo reflesaun ba istória pasadu no hanoin saida mak presiza atu halo liuliu kontinua nia resposabilidade ba liberta povu husi kiak no mukit”, nia fó hanoin.
Loron 3 Marsu sai hanesan loron nasionál veteranu tanba atuál Primeiru-Ministru, Kay Rala Xanana Gusmão ho Komandante Mauhunu Karataiano mak reorganiza funu mak deside loron 3 Marsu 1981 hanesan loron ba vetetanu sira.
Iha fatin hanesan, Reprezentante Prezidente Autoridade Kovalima, Caetano dos Santos Ribeiro, dehan veteranu sira mak fundadór nasaun, nune’e atu labele haluha veteranu sira-nia istória presiza respeitu no agaradese sira.
“Ohin loron Timor ukun rasik-aan hanesan lembransa ne’ebé veteranu sira husik ba ita liuhusi loron nasionál veteranu atu ita labele haluha liuhusi sira nia luta mak ohin loron ita goja independensia ne’e,” nia fó hanoin.
Jornalista:Celestina Teles
Editór:Florencio Miranda Ximenes
