DILI, 03 Marsu 2026 (TATOLI)—Reprezentante Veteranu, Manuel Soares, husu ba Governu Konstitusionál da-sia (IX) liuhusi Ministériu Saúde tenke halo tratamentu urjente ba veteranu sira bainhira moras, tanba ho veteranu sira-nia luta mak Timor-Leste bele hetan ukun rasik an.
“Ha’u-nia rekomendasaun ba Ministériu Saúde, ita-nia veteranu mais importante tanba ami-nia luta mak ohin loron ita ukun an. Tenke haree ami ho didi’ak. Banhira ami moras fó tratamentu urjente tantu rai-laran no mós rai-li’ur,” Manuel Soares hateten ba Agêbcia TATOLI hafoin partisipa loron nasionál veteranu iha Lomoro, ohin.
Niahatutan, ba povu baibain mós banhira sita-nia familia mai hateten katak ema ne’e moras fó tratamentu lalais hodi labele husik to’o ema moras todan mak lori ba rai-li’ur.
“Saúde ne’e importante ba ema-nia moris, tanba ne’e Governu hasai osan hodi halo tratamentu ba ema hotu iha rai-laran no rai-li’ur. aibé nafatin hadi’a tratamentu di’ak ba ema hotu, tanba saúde ne’e di’ak mak ita hamutuk hodi lori nasaun ne’e ba oin,” nia dehan.
Nia dehan, Governu tenke hadi’a sistema burokrasia tanba bainhira veteranu ruma moras urjente la halo kazu lalais no ikus ema-ne’e mate.
“Ami-nia luta mak ohin loron ukun an, tanba ne’e haree ami-nia maluk sira-ne’ebé moras tenke fó tratamentu di’ak ba sira. Tanba, dahuluk ami-nia moris atu kontribui ba nasaun no daruak povu moris atu servisu hamutuk,” nia hateten.
Nia haktuir, loron nasionál veteranu ne’e loron ida-ne’ebé mak importante tanba hanoin fila-fali ba tinan hira ba kotuk, terus no susar hodi hamlaha ba hahan iha ai-laran, nune’e moris to’o funu ne’e ramata ikus Timor-Leste ukun an.
“Tanba ne’e, ha’u-nia sentimentu mak husi terus no susar ikus rezultadu ukun an, maibé Estadu mós valoriza ami-nia direitu to’o ohin loron ami simu ona osan veteran nian,” nia dehan.
Nia hateten, prosesu dezenvolvimentu nasionál agora daudaun la’o ho di’ak, tanba ne’e nia husu ba ema hotu inklui veteranu sira labele impede dezenvolvimentu ne’ebé mak agora daudaun Governu halo.
“Husu ba ita hotu tenke kontribui dezenvolvimentu nasionál labele impede servisu sira-ne’ebé mak Governu agora daudaun halo,” nia dehan.
Iha fatin hanesan, veterana Jacinta Guterres Monteiro ladun kontente ho komemorasaun loron nasionál veteran, tanba Xanana Gusmao iha ai-laran ko’alia ida mai iha ne’e ko’alia buat seluk.
“Nia hahalok iha ai-laran di’ak maibé mai iha ne’e oin seluk. Ha’u ladun gosta, tanba ha’u mai ne’e sira fó konvite mak ha’u mai partisipa de’it, ne’ebé ha’u lakohi ko’alia,” nia dehan.
Nia esplika, durante ne’e Governu selu ona veteranu sira-nia direitu durante halo funu iha ai-laran maibé kada fulan sira ko’a $30.
Jornalista : Felicidade Ximenes
Editór : Cancio Ximenes
