Governu sei hasai millaun $18 husi OJE ba EDTL implementa Solár Panél iha Laleia
DILI, 04 Marsu 2026 (TATOLI)—Governu sei hasai millaun $18 husi osan transferénsia Orsamentu Jerál Estadu (OJE) 2026 hamutuk millaun $121,9 ba Eletrisidade Timor-Leste (EDTL) iha ámbitu programa “Eletrisidade 802”, hodi implementa solár panél iha Postu Administrativu Laleia, Munisípiu Manatutu.
Desizaun ne’e aprova iha reuniaun Konsellu Ministru neʼebé aprezenta husi Ministra Finansa, ne’ebé determina abertura ba konta fidusiária ida entre Ministériu Finansa ho EDTL, E.P, iha Banku Sentrál Timor-Leste, ho intensaun atu garante operasionalizasaun Garantia Estadu nian ne’ebé relasiona ho dezenvolvimentu Projetu Sentrál Enerjia Solár TIM nian.
Ministru Obra Públika, Samuel Marcal, informa kona-ba solár PV ne’ebé Primeiru-Ministru, Kay Rala Xanana Gusmão, husu atu asesu estrada iha Postu Administrativu Laleia, Munisípiu Manatutu ho estaleiru ne’ebé atu halo iha ne’ebá.
“Implementasaun solár PV ho ninia mega watt hamutuk 75 Mw, ne’e prosesu asina MoU hotu ona maibé presiza lori mai aprezenta iha Konsellu Ministru hodi hetan aprovasaun no implementa iha tinan ne’e,” Ministru Samuel informa ba jornalista sira iha Ministériu Finansa, ohin.
Tanba tuir termus husi Rezolusaun Governu nian ne’ebé agora aprova ona, Ministériu Finansa sei loke konta fidusiária to’o montante másimu millaun $18, montante ida-ne’ebé sei utiliza eskluzivamente hodi apoia kualkér pagamentu sira tuir Garantia Estadu nian relasiona ho Projetu Tim Solár Panél.
Montante ida-ne’e sei hasai husi montante globál millaun $121,9 neʼebé autoriza ona ba transferénsia husi Orsamentu Jerál Estadu ba EDTL, iha ámbitu programa “Eletrisidade 802”, ho intensaun atu garante kontinuidade servisu fornesimentu eletrisidade públika nian.
Medida ne’e mai husi Kontratu Akizisaun Enerjia ne’ebé asina husi EDTL ho konsórsiu internasionál ne’ebé responsável ba dezenvolvimentu projetu no ho objetivu atu garante katak, karik ativa garantia Estadu nian.
Nune’e iha mekanizmu klaru no imediatu hodi halo pagamentu sira-ne’ebé prevee ona, atu nune’e bele garante simultaneamente transparénsia no rastreabilidade (akompaña ho fasil) operasaun finanseira nian.
Jornalista : Alexandra da Costa
Editór : Cancio Ximenes
