DILI, 04 Marsu 2026 (TATOLI)—Ministru Planeamentu no Investimentu Estratéjiku, Gastão Sousa, aprezenta relatóriu monitorizasaun hosi progresu Planu Estratéjiku Dezenvolvimentu Nasionál Timor-Leste 2011-2030 nian, ne’ebé avalia grau ezekusaun husi meta ne’ebé define to’o tinan 2024 nia rohan, ba Konsellu Ministru.
Ministru Planeamentu Investimentu no Estratéjiku, Gastão Sousa, hateten ohin aprezenta kona-ba monitorizasaun implementasaun Planu Estratéjiku Dezenvolvimentu Nasionál (PEDN) 2011-2030, maibé implementasaun to’o de’it tinan 2024, katak progresu saida mak Governu halo tiha ona to’o agora, nune’e iha aprezentasaun ohin dehan katak iha 200-resin mak atinje ona nia meta, ne’ebé iha meta 199 mak ami aprezenta nia progresu to’o 2024.
“PEDN ne’e foka prioridade ba setór lima hanesan setór sosiál, ekonómiku, infraetrutura, makro ekonómia no dezenvolvimentu institusionál, husi setór hirak ne’e iha balun mak atinje ona meta balun maka konklui ona balun parsiál no avansadu,” Ministru Gastão informa ba jornalista sira iha Ministériu Finansa, ohin.
Maibé, nia dehan, iha meta hitu (7) mak seidauk implementa ka seidauk to’o meta ne’e mak iha kapitál dezenvolvimentu hela haat (4), infraetrutura iha rua (2) no hela no makro ekonómia ida (1), kauza seidauk atinje meta ne’e tanba seidauk iha planu ba implementasaun, entaun ministériu ida-idak rasik mak define programa no prevee orsamentu atu implementa iha kualkér tinan.
Tanba relatóriu ne’e analiza progresu husi meta 199 ba prazu badak no médiu, ne’ebé fahe iha setór prinsipál lima (Kapitál Sosiál, Infraestrutura, Dezenvolvimentu Ekonómiku, Kuadru Institusionál no Vizaun Makroekonómika), no identifika avansu sira-neʼebé alkansa ona, dezafiu estruturál persistente sira no prioridades asaun nian ba períodu to’o 2030, ho objetivu atu apoia kona-ba foti desizaun no reforsa efikásia hosi implementasaun Planu.
Jornalista : Alexandra da Costa
Editór : Cancio Ximenes
