DILI, 04 Fevereiru 2026 (TATOLI)—Governu liuhusi reuniaun Konsellu Ministru, kuarta ne’e, halo analiza kona-ba Timor-Leste nia partisipasaun iha sesaun anuál husi Komisaun kona-ba Estatutu Feto Nasaun Unida (Commission on the Status of Women–CSW), ne’ebé sei realiza iha 09-19 Marsu 2026, iha Nova Iorke, ne’ebé aprezenta husi Sekretária Estadu Igualdade (SEI), Elvina de Sousa Carvalho.
Sekretária Estadu Igualdade, Elvina de Sousa Carvalho, esplika kna’ar husi komisaun ida-ne’e, nu’udar órgaun prinsipál intergovernamentál Nasaun Unida nian ne’ebé dedika ba promosaun igualdade jéneru no empoderamentu ba feto sira, hodi halibur Estadu-Membru no parseiru internasionál sira tinan-tinan atu avalia progresu no define orientasaun polítika iha área ida-ne’e.
“Timor-Leste sei reprezenta iha eventu ne’e, informa mós katak sei ko-organiza, iha parseria ho UN Women,” Elvina hateten ba jornalista sira iha edifisiu Ministériu Finansa, kuarta ne’e.
Nia dehan, nasaun oioin mak sei partisipa iha eventu ne’e no eventu paralelu ida, ho objetivu atu fahe esperiénsia no hametin polítika igualdade jéneru, inklui iha área prevensaun violénsia bazeia ba jéneru, empoderamentu ekonómiku ba feto sira no promosaun ba sira-nia partisipasaun iha vida polítika.
Partisipasaun ida-ne’e mós sei permite ita atu aprezenta dezenvolvimentu nasionál sira iha área ida-ne’e no hametin kooperasaun internasionál iha área ida-ne’e.
Jornalista : Hortencio Sanchez
Editór : Cancio Ximenes
