OEKUSI, 04 Marsu 2026 (TATOLI) – Iha kuarta-feira ohin, tuku 03:35, ekipa husi Provedória Diretu Umanu no Justisa (PDHJ), vizita supreza ba edifisíu Diresaun Rejionál Agrikultura Rejiaun Administrativa Espesiál Oekusi Ambeno (RAEOA), hodi averigua no prosede investigasaun ba Diretór Agrikultura, José Oqui, kona-ba prosesu fornesimentu karau liuhusi programa inseminasaun artifisiál ba sub-rejiaun haat iha Oekusi.
Notísia relevante:Diretór Agrikultura RAEOA klarifika prosesu fornese karau inan ba programa inseminasaun artifisiál
Jornalista Ajénsia Tatoli,I.P observa, ekipa PDHJ lidera husi Diretór PDHJ Delegasaun Territoriál Oekusi, Bartolomeu Gonçalves, to’o edifísiu Diresaun Rejionál Agrikultura, tuku 02:30, hodi rejista naran iha resepsionista.
Hafoin ne’e, resepsionista hakat tama sala Diretór Diresaun Rejionál Agrikultura, José Oqui, hodi informa kona-ba vizita supreza PDHJ nian. Maibé, iha minutu hirak-ne’e la konsege tama.
Nune’e, ekipa PDHJ obrigatóriamente tenke hein kuaze oras ida, hahú husi tuku 2:30 to’o tuku 3:35 mak foin hasoru Diretór Agrikultura.
“Jornalista sira bele hein iha li’ur, depois investiga mak bele hala’o entervista kona-ba rezultadu investigasaun ne’e,” informa Diretór PDHJ ba jornalista sira iha edifísiu Agrikultura Oekusi.
Oras ne’e daudaun Jornalista Tatoli,I.P nafatin hein hela iha terrenu hodi akompaña prosesu averiguasaun no investigasaun iha terrenu.
Jornalista: Abílio Elo Nin
Editór: Rafael Ximenes de A. Belo
