Ramos-Horta propoin ba Governu atu selebra tinan 30 ezisténsia CPLP iha Portugál
DILI, 05 Fevereiru 2026 (TATOLI)–Prezidente Repúblika, José Ramos-Horta, propoin ba Governu Konstitusionál da-sia (IX) atu realiza selebrasaun tinan 30 ezisténsia Komunidade Nasaun Sira Ko’alia Lian Portugés (CPLP-sigla portugés) iha Lisboa-Portugál.
“Primeiru-Ministru, ami ko’alia hela kona-ba ita atu organiza atividade sira CPLP nian. Ita mak agora hanesan Prezidensia, atividade sira Governu mak deside, ba tinan 30 ezisténsia CPLP di’ak liu halo iha Portugál. Ho razaun katak, tinan primeiru hamoris organizasaun ne’e iha Portugál. Ho nune’e, eziténsia CPLP ba tinan 30, ita selebra iha Portugál,” Ramos-Horta hateten ba jornalista sira iha Palásiu Prezidensiál Nicolau Lobato Dili, kinta ne’e.
Selebrasaun ne’e realiza iha Portugál, nia dehan, atu nune’e fasíl liu ba nasaun membru sira seluk bele hala’o viajen ne’ebé besik.
“Ida-ne’e fasíl liu ba rai sira seluk halo vaijen besik, ita mak dook laiha buat ida. Estrutura no buat hotu prepara iha ne’ebá, atu halo kmaan Governu nia servisu sira,” nia dehan.
Nia hatutan, Xefe Governu aseita ho hanoin Xefe Estadu nian ne’ebé atu selebra tinan 30 aniversáriu CPLP nian ne’ebé realiza iha Portugál.
“Primeiru-Ministru kontente tebes, maibé buat hotu husik Governu mak deside. Hanesan Prezidente, tuir de’it saida mak Governu deside,” nia dehan.
Jornalista : Hortencio Sanchez
Editór : Cancio Ximenes
