VIKEKE, 06 Marsu 2026 (TATOLI)—Komandante Autoridade Protesasun Sivíl (APC-sigla portugeza), Cirílio Soares Gomes, informa APC Munisípiu Vikeke apoia ona foos hamutuk saku 200 ba Suku Luka, Postu Administrativu Vikeke Vila, hodi tulun vítima dezastre naturál no família vulneravel sira.
“Ami distribui ona foos hamutuk saku 200 ba Suku Luka, atu ajuda ita-nia komunidade ne’ebé afeta ba dezastre no família sira-ne’ebé vulneravel tanba iha tempu udan hanesan ne’e ita-nia komunidade la’o sai bá merkadu mós ladi’ak. Entaun, ami apoia foos ba sira atu autoridade sira bele fahe ba komunidade sira,” Cirílio hateten ba TATOLI iha Postu Vikeke Vila, Sesta ne’e.
Komandante APC Munisípiu Vikeke ne’e haktuir distribuisaun foos saku 200 ne’e aloka bá Aldeia Uma-Boot (Suku Luka) hamutuk saku atus 100 no Suku Luka hamutuk saku 100.
“Foos ne’e oferese ba Suku Luka hamutuk saku 100 ida-ne’e xefe suku sira mak halo fali identifikasuan ba ita-nia komunidade sira-ne’ebé vulneravel. Enkuantu, bá Aldeia Uma-Boot ne’e xefe aldeia sira fahe ba vítima dezastre natural sira iha Uelolo tanba agora daudaum ne’e komunidade sai bá sosa foos mós ladi’ak tanba mota tun, entaun liuhusi apoia foos ne’e bele hakmaan sira-nia sofrimentu ba ai-han,” Cirílio haktuir.
Iha fatin ketak, Xefe Aldeia Uma-Boot, Suku Luka, Jeremias Marques, hato’o agradese ba APC tanba bele ajuda ona foos ba komunidade hodi aguenta moris tanba agora daudaun mota halai tuir dalan entaun negosiante sira labele mai fa’an foos iha Aldeia Uma-Boot.
“Ha’u sente foos saku 100 la sufisiente ba populasaun Aldeia Uma-Boot, maibé ida-ne’e apoia husi Governu liuhusi APC ne’ebé tuir sira-nia kapasidade ne’ebé sira iha. Nune’e, ami autoridade no komunidade simu ho fuan, depoiz ami fahe uitoan-uitoan ba malu hodi auguenta moris iha tempu udan,” nia hato’o.
Suku Luka iha aldeia hamutuk haat (4) ho abitante hamutuk 2.395. Enkuantu, populasaun Aldeia Uma-Boot hamutuk na’in-624 no uma-kain na’in-162 ne’ebé hela iha área Uelolo.
Jornalista: Vitorino Lopes da Costa
Editór: Xisto Freitas da Piedade
