KOVALIMA, 06 Marsu 2026 (TATOLI)- Prezidente Autoridade Munisípiu Kovalima, Miguel Armada Cardoso, orienta líder komunitária hodi organiza komunidade hala’o limpeza jerál iha autoestrada munisípiu Kovalima.
“Limpeza jerál hanesan atividade ho inisiativa husi komunidade atu hamoos duut sira iha autoestrada,” Prezidente Autoridade Kovalima ne’e ba jornalista sira iha autoestrada parte Labarai, ohin.
Razaun atividade ne’e, nia dehan atu hamoos ka tesi ai-hun boot sira ne’ebé taka autoestrada hodi fasilita movimentu transporte no ema ho seguru.
“Ha’u agradese ba komunidade no funsionáriu sira ne’ebé hakarak kontribui ba limpeza ne’e,”nia agradese.
Iha fatin hanesan, Xefe Suku Labarai, Paul de Sena, afirma mobiliza komunidade hala’o limpeza jerál bazeia ba Dekretu-Lei númeru 9/2019, ko’alia líder komunitária iha kompeténsia atu organiza komunidade.
“Ho nune’e ha’u nia komunidade durante sesta semana tolu ona molok limpeza ami hahú enkontru iha nível aldeia no ami la obriga komunidade sira maibé komunidade rasik ho voluntáriu halo limpeza jerál hodi dezenvolve suku ho ambiente ne’ebé moos,”nia dehan.
Jornalista:Celestina Teles
Editór:Florencio Miranda Ximenes
