VIKEKE, 06 Marsu 2026 (TATOLI)—Prezidente Autoridade Munisípiu Vikeke hamutuk ho Servisu Edukasaun Munisípiu, Kinta (05/03), koloka profesór bolsa kandidatu hamutuk na’in-110 ba Ensinu Báziku Sentrál (EBC-sigla portugeza) 18 iha Munisípiu Vikeke.
Iha serimónia kolokasaun profesór ba EBC sira-ne’e, Prezidente Autoridade Munisípiu Vikeke, Francisco C. S de G. Soares, husu profesór bolsa kandidatu sira labele hanoin halai fila tanba Ministériu Edukasaun (ME) koloka ona bá kada eskola sira hodi hanorin estudante sira.
“Ohin ha’u simu profesór bolsa kandidatu husi Ministériu Edukasun (ME) koloka mai munisípiu Vikeke hamutuk na’in-110 hodi distribui tutan ba ensinu báziku sira. Ha’u espera liuhusi profesór sira-ne’e bele ajuda no hakmaan eduaksaun Munisípiu Vikeke tanba profesór sira-ne’e mai ho kapasidade adekuada. Nune’e, husu profesór sira labele halerik halai fila,” Francisco hateten iha serimónia abertura kolokasaun profesór ba EBC 18, iha salaun edukasaun munisipál.
Autoridade Munisípiu Vikeke ne’e enkoraja profesór sira tenke enfrenta situasaun saida de’it mosu iha terrenu tanba profesór sira-ne’e preparadu ona ba hanorin estudante.
“Liuhusi kolokasaun sira-ne’e bele aumenta esperiénsia manorin sira-nian área edukasaun, tanba imi koloka mai ne’e iha kapasidade hodi adapta tuir teknolojia moderna. Ha’u prontu kolabora no apoiu Ministériu Edukasaun no manorin-na’in sira ne’ebé hanorin ita-nia oan sira iha Vikeke,” nia hato’o.
Aleinde ne’e, nia sujere profesór sira-ne’ebé mai halo servisu Estadu labele lori interese partidária sira tama iha eskola sira, labele lori arte marsiál iha eskola, maibé hanoin mak edukasuan estudante sira sai fini futuru nasaun.
Iha fatin hanesan, Diretór Edukasaun Munisípiu Vikeke, António Pinto da Silva, haktuir, profesór bolsa kandidatu koloka mai Munisípiu Vikeke totál hamutuk na’in-110 ne’ebé sei koloka ba EBC 18, bazeia ba despaxu ME nian katak profesór sira-ne’e sei la muda tun-sa’e.
“Iha despaxu ne’e orienta ami fó garantia ba administrativu de’it. Ami sei la muda profesór ba fali fatin seluk. Nune’e, ha’u sei orienta mós ita-nia diretór eskola sira hodi akompaña profesór kolokadu sira hodi eduka ita-nia oan sira,” nia hato’o.
Tuir dadus, profesór hirak-ne’e lokaliza bá EBC iha postu administrativu lima kompostu husi Vikeke Vila hamutuk na’in-32, Lakluta na’in-12, Ossú na’in-31, Uatulari na’in-24 no Uatukarbau na’in-11.
Iha serimónia kolokasaun profesór ba EBC 18 ne’e, partisipa husi diretór eskola, funsionáriu edukasaun Munisípiu Vikeke no profesór kolokasaun hamutuk na’in-110.
Jornalista: Vitorino Lopes da Costa
Editór: Xisto Freitas da Piedade
